Валентин Петрович Алгаев – ИЗО ден художественный паша предметым туныктышо, Шернур районысо йоча усталык пӧртын ешартыш шинчымашым пуышо педагогшо.
В.П.Алгаев 1964 ий 17 августышто Шернур район Ананур ялыште шочын. Ончыч шке ялысе тӱҥалтыш школышто, вара Купсола кандашияш да Кукнур кыдалаш школлаште тунемын, Йошкар-Оласе художественный училищын выпускникше. Москосо пластический искусство открытый университетысе Б.М.Неменскийын вуйлатыме курслаштыже шке профессионализмжым нӧлтен.
Валентин Петрович педагогикылан ятыр ийым пӧлеклен. Армий гыч пӧртылмекыже, 1991-2015 ийлаште Купсола тӱҥ школышто ИЗО ден художественный трудым туныктышылан ыштен, тыгак йоча-влакым кружоклаште пу гыч пӱчкедаш, ӱяҥге воштыр дене пидаш, пу арверлаште сӱретлаш, макрамем ышташ туныктен. 2015 ий гыч – Кукнур кыдалаш школысо йоча усталык пӧртын ешартыш шинчымашым пуышо педагогшо.
Валентин Петровичын кидше чыла пашалан толеш: плотник сомылымат ышта, коҥгамат опта. Мӧҥгыштыжӧ ятыр арверым шке ямдылен. Алгаевмыт тукымышто чылан усталык шӱлышан лийыныт. В.П.Алгаевын кочаже бочкым ямдылыше мастар семын палыме лийын – ты кундемыште 150 литр пурыман бочкым тудо гына ыштен моштен. Валентин Петровичын ачажат шӧртньӧ кидан лийын. Теле кастене тудо тӱрлӧ кидпаша дене шинчылтын, а эргыже-влак воктеныже полышкаленыт, ачаштым ончен, шкежат тунемыныт.
В.П.Алгаевын мӧҥгыштыжӧ ятыр мотор картине кеча: пӱртӱс сӱрет, янлык-влак, портрет ден натюрморт-шамыч. Шернур посёлкысо тоштерыште Валентин Петровичын ончержат эртаралтын.
Шке мастарлыкшылан педагог кушкын толшо тукымым туныкташ тырша. Кукнур кыдалаш школышто тудо икшыве-влакым сымыктыш дек лишкырак лияш ӱжеш. Ӱдыр-рвезе-влак «Резьба по дереву», «Лепка», «Роспись» кружоклаш уло кумылын коштыт. 2017 ийыште Валентин Петрович «Сердце отдаю детям» педагогический конкурсышто сеҥен. 2020 ийыште Шернур районын тӱвыра пӧлкаже «Кукнурские глинульки» проектыште сеҥен. Тидлан Валентин Петрович икмыняр сувенирым шке шонен луктын да ямдылен: «Йӱштӧ Кугыза», «Лумӱдыр», «Марий вате».
2021 ийыште калык мастар-влакын «Русь мастеровая» XIX Российысе конкурсыш ушнен да «Керамика» номинацийыште кокымшо верым налын. 2022 ийыште «Туристический сувенир» Российысе конкурсышто мастарлыкшым терген, республик кӱкшытыштӧ «Сувенир региона» номинацийыште сеҥен. Районысо тӱвыра пӧлкан йодмыж почеш мастар еҥ «Марий йомак-влакын геройышт» темылан фигур-влакым пу гыч пӱчкеден. Кызыт Валентин Петрович «Изи шӱвыр», «Шордо» сувенир-влакым ямдыла.
В.П.Алгаев – РФ общий образованийын почётан пашаеҥже. Марий Элысе образований минитсерствын, тыгак Шернур районысо администрацийын да Шернур районысо туныктымо пӧлкан Почётан грамотылаж дене палемденыт. Тудын ятыр таумут серышыже уло, мастар еҥ нерген районысо да республикысе газетлаште чӱчкыдын возат.
Яна Четкарёва.
Шернур, Кукнур