4 октябрь гыч 1 ноябрь марте Калининград областьыште самырык-влаклан «ШУМ» форум эртен. Тудо Росмолодёжьын полшымыж дене илышыш шыҥдаралтеш, элнан тӱрлӧ кундемже гыч ӱдыр-рвезе-шамычым йырже чумыра. Тенийысе форум самырык медиаспециалист-влакым профессионально шуарымылан виктаралтын.
Ты форумыш Марий кугыжаныш университетысе Калыкле тӱвыра да тӱвыра кокласе кыл институтын студенткыже Кристина Ануфриева миен коштын. Ӱдыр «Цифра» командын ик еҥже лийын. Ты команде Российысе «Знание» тӱшкан ямдылыме кейсшым решатлымаште сеҥышыш лектын. Участник-шамыч «ВКонтакте» тӱшкаште чат-ботым да лендингым разрабатыватленыт, куштыжо событий-влак дене календарь ончыкталтеш. Тушто жапым да кечым ойыраш, тыгак моло данный-влакым пурташ йӧн пуалтеш.
Йот йылмым изинек тунемын
Кристина Татарстан кундемысе Набережный Челна олаште шочын-кушкын. Верысе 77-ше номеран гимназийыште шинчымашым поген. Изинекак йот йылмылам тунемме кружоклаште шуаралтын. Ятыр олимпиадыште уш-акылжым терген.
Марий Элыш толмо деч ончыч ӱдыр Озаҥ оласе федеральный институтышто профессионал шинчымашым налаш ямдылалтын, икмыняр специальностьышто шкенжым ончен. Тудын ойлымыж почеш, тыге шкенжым тӱрлӧ шӧрыныштӧ кычалын, чыла ыштен ончымо да пален налме шуын.
– Марий кугыжаныш университетыш йӧршеш вучыдымын логалынам, манаш лиеш. Озаҥысе университетыште тӱрлӧ факультетыште шинчымашым налынам. Пытартыш гана шкем историй да археологий специализацийыште тергенам. Тидат мыйын огыл манын умыленам да у йылмым, предметым тунемаш тӱҥалынам. Эртыше идалык мучаште Марий Элысе вузыш кусаралтынам.
Кызыт «Международные отношения» направлений дене «Мировая политика и международная экономическая торговля» специальностьым налаш ямдылалтам. Тидлан нимынярат ом ӧкынӧ. Яра жапем веле уке, южгунамже, тиде илышыштем эн кугу ситыдымаш манын шонем, – каласкалыш К.Ануфриева.
Эреак ум кычалеш
Кристина вузын илышыштыжат йӧн лекме семын чолгалыкшым ончыкташ тырша. Тудлан утларакшым у проект дене пашам ышташ, форумлашке лектын кошташ келша. «ШУМ» форумыш миен-коштмыж нерген тыгерак палдарыш:
– Тенийысе тунемме идалыкыште ты форум кугу кышам кода. Тылеч ончычат ятыр форумышто лийынам, команде-шамыч денат ятыр гана сеҥышыш лектынам. Но форум деч умбакыже моштымашем вияҥын огытыл, манаш лиеш. «ШУМ» форумышто ме шкенам шке сеҥенна. Эн ончыч командыш участник-шамычым ойырымыштым палемдынем. IT специалист-влак дене пашам ыштымаш мыланем у лийын. Нунын дене ынде утларак кугешнаш тӱҥалам. Мый ик косметологий клиникын контент-пӧлкажым вуйлатем. Садлан форумыш шке пӧлкамын контентшым вияҥдаш тунемаш шонымаш дене каенам.
Форумыш логалаш манын, Кристина портфолиожым сайынак ямдылен. А тушко эртымыж нерген пален налмеке, эшеат чот йывыртен.
– Форумыш виян спикер-влак толыныт, оҥай, тунамак неле кейсым решатленна, тыгак нетворкинг лийын. Мемнан командыланна лектор ден площадке-влак кокласе икгайлыкым автоматизироватлаш кӱлын. Тидлан лӱмын CRM-системан сайтым шке чат-ботшо дене ыштенна. Кейсым ямдылыше-влаклан мемнан шонымашна пеш келшен. Ынде нунын дене умбакыжат ты сомылым пырля виктараш тӱҥалына. А шке семын тушто сайт да сообщество дене пашам ышташ тунемынам, – палдарыш ӱдыр.
Кристинан ойлымыж почеш, тыгай форумыш ончыкылык нерген шонышо, шке пашаштым сайын палыше, моштымышт да палымышт нерген ойлаш лӱддымӧ ӱдыр-рвезе-влак толыт. А тыгай еҥ-шамыч ончыкыжым моткоч сай специалист лийыт!
Ӱдыр ончыкыжым молодёжьлан шке медиа-кумдыкшым почаш шона. Садлан кызыт уло жапше да вийже лачшым ты сомыллан виктаралтын. Тудо, чынжымак, тидын шотышто шуко пашам ышта. А яра жапше лийме годым путешествоватлаш йӧрата.
К.Ануфриеван альбомжо гыч налме фото.