Кугу мастарлыкым йодшо

20-26 апрельыште Э.Сапаев лӱмеш опер да балет театрыште  балет артист ден хореограф-влакын  всероссийский конкурсышт эртаралтын.

Тудо кум тур дене лийын. Конкурсышто шке мастарлыкшым Йошкар-Ола гыч Виктор Шутылев терген, но кумшо турыш логалын огыл. Кокымшо турышто 16 хореограф шке пашажым ончыктен, кумшышто – кандаше.

Шӧртньӧ медальым да лауреат лӱмым Моско гыч хореограф Лилия Симонова сулен. Ынде тудо А.С.Пушкинын «Евгений Онегин» романже почеш балетым Йошкар-Олаште Э.Сапаев лӱмеш опер да балет театрыште шындышаш. Ешарена: Л.Симонова «Современный танец» номинаций дене кодшо ийын лийше конкурсышто кокымшо верым налын ыле.

Кокымшо верыш Ростов-на-Дону гыч Вита Мулюкова ден Москва гыч Константин Матулевский лектыныт. Нуно шке постановкыштым Пошкырт опер да балет академический театрыште ончыктат.

Кумшо вер дене Санкт-Петербург гыч Антон Дорофеев палемдалтын. Тудлан балетым Воронежысе опер да балет театрыште шындыман.

«За высочайший профессионализм, проявленный на конкурсе» спецприз дене Росконцерт Э.Сапаев лӱмеш опер да балет театрын труппыжым палемден.

Сеҥыше Лилия Симонова:

– Конкурслан моткоч кӱжгӧ пашам шуктыман ыле. Условийже куштылгак огыл: ме ямде либретто дене толшаш да тыгодым вуйушышто кум постановкым кучышаш улына. Кокымшо этапыш каена гын, нуным шынден шуктыман, а тидыже изижак огыл, поснак – тӱшка сценыже. Соло-дуэтым ме Москоштак ямдыленна. Соло семын «Евгений Онегин» роман почеш Ленскийын дуэль деч ончычсо сценыжым ончыктенна – йӱдым тургыжланымыжым, самырык да йӧратымаште шӱм-чон шокшылыкшым пуртенна. Кокымшо сценыште Онегинын Татьянам йӧратен шындымыжым ончыктымо, кумшышто – Татьянан омыжым.

 «Современная хореография» жанрыште иктат уке ыле. Тыгодым классик-влакын произведенийлашт дене пырля у сынан кызытсе хореографийымат шындаш йӧн улмым пеҥгыдемдаш шоненам. Артист-влакын эрыканрак стиль дене моторын куштымыштым тыштат ончыкташ лиеш. Нуным герой семынак ончем, вет икмыняр жапыште постановкым шындаш да ончыкташ кӱлын. Кок кечыште куд шагатыште кандаш минуташ кок постановкым ямдыленна. Сандене конкурс мастарлыкнам чотак тергыш манын кертам.

 

Эльвира Терентьева.

Авторын да Е.Никифоровын фотошт.