Шочмо калыкнан лÿмлö эргыже, акрет годсо гыч тÿҥалын, таче кече марте марий семым шымлен, тудын ойыртемалтше савыртышан улмыжым умылтарен-палдарен, калыкнан ойпого поянлыкшым почын пуаш полшышо семмастар, музыковед, искусствоведений доктор Олег Герасимов нерген. Тудлан 16 февральыште 85 ий теме.
(Возымым кӱчыкемден савыктыме. Тичмашнек «Кугарня» газетыште лудман)
Шкежат ойыртемалтше…
О.Герасимов – кажне гана мо дене гынат öрыктарен моштышо айдеме. Икымше гана мый тудым Марий кугыжаныш университетыште «Рия-рия» ансамбльым вуйлатымыж годым вашлийынам. Пöръеҥ семын уто пеҥгыдылык деч посна порын, лывыргын пелештымыж дене кумылым налын. Тунамак ойыртемалтше гармонь йӱкшӧ дене куандарен: шоктымыж годым кажне сем савыртышыже ик тудлан гына келшыше манын эре эскеренам. Да, кеч мутшым нал, кеч семжым колышт – чылажат шкешотан. Олык Ипай лÿмеш кугыжаныш премий дене палемдалтше чапланыше «Рия-рия» ансамбльын муро-куштымашыжат, артист-влакын чиемыштат тунам йöршын вес тÿрлö лийыныт.
…Ешынат посна йӱла
Кызыт тудо еш дене Йошкар-Ола воктенысе Шоядÿр ялыште шукерте огыл чоҥымо пӧртыштышт илат. Шке йÿла ойыртемышт уло. Тиде суртышто чай олмеш поген-коштымо шудым гына шолтен йÿыт, кевытыште тÿрлö тамлештарыман кочкышым огыл, а ожнысо рецепт почеш ямдылымым йöратат.
– Кызыт шÿвылвÿдым лукшо ала-могай кочкышымат темлат, но тыгайлан «вуйым огына пу», кевытыште эрежак тазалыклан пайдалым ужалат манын ом керт, – ойла Олег Михайлович. – Айдеме эреак шке кап-кылжым шижын, тазалыкшым эскерышаш. Сандене илышыште кеч-кунамат шот-ратым палыман, кочкыш-йÿышым ойырымо годымат. Кеҥеж гоч лу деч утларакат тÿрлö шудым погаш жапым муам, уло ешге шудо чайым гына подылын, вийым погаш тыршена. Шöр-торык деч посна илымаш уке. Кÿчымторыкым, шöрыш кинде катышым пыштен, шопыктарен, шке ямдылем. Арнялан ик гана тудым уржа кинде, чумыраш пареҥге дене ом коч гын, темде коштмыла чучеш. Утларакшым шорык шылым йöратем, сöсна мылам ок кÿл. Колбаса кузе ышталтмым палем: икмыняр пачаш шолтен-паритлен ямдылыме дене шыл тамжат ок код, сандене умшашкат ом нал мый тудым.
Шампунь ден шовынат ок кӱл тудлан, мончаште гын шун дене мушкылтеш, лÿмегож выньык дене перкален, могырым кандараш йöрата. Кузе кужу ÿмыран лияш манмылан вашмут тыште мыняр-гынат уло, очыни.
Паша лектыш
Шукертак сулен налме канышыште гынат, Марий кугыжаныш университетыште – профессор, И.Палантай лÿмеш тÿвыра да сымыктыш колледжыште – туныктышо, Н.Жиганов лÿмеш Озаҥысе кугыжаныш консерваторийыште – татар музык да этномузыкологий кафедрын доцентше.
Чылаже 300 наре (вес эллаште савыкталтшыжат) шымлымаш пашам возен. Нылле наре книгам луктын.
Тукым кыл
Олег Герасимов – марий сылнымутлан негызым пыштыше поэт-влак кокла гыч иктыже, икымше марий баснописец, чапланыше туныктышо Г.Микайын эргыже. Ачаже, Михаил Степанович, шинчымашым погымыж годым экзаменым экстерн йöн дене кучен, латвич ияшак туныкташ тÿҥалын. Вара шочмо ялыштыже шке вий денак школым чоҥаш пижын.
Тудо ныл уныкан, кок кугезе уныкан коча. Эльвира пелашыже Йошкар-Оласе П.Чайковский лÿмеш искусство школышто туныкта, вуйлатышын алмаштышыжлан ышта. Верук ÿдырышт Озаҥысе консерваторийыште тунемын, шанчызе корныш шогалын, кандидатлык диссертацийым воза.
Шылтыде каласаш гын, О.Герасимов кокымшо ешым чумырен. Ончычсо пелашыжат Эльвира лÿман лийын, ÿдыр ден эргышт кушкыныт: Ольга ӱдырышт кызыт Москваште Г.Плеханов лÿмеш академийыште туныкта, экономике науко кандидат. Игорь Йошкар-Оласе заводышто пашам ышта.
Лӱмлӧ еҥна икана мутланыме годым оҥай историйымат шарналтен ыле…
Могайым? — «Кугарня» газетыште пален налаш лиеш. Тудо «Марий Эл мучко чыла почто отделенийыште, киосклаште ужалалтеш. Газетым тичмашнек онлайн тыште лудаш лиеш.
Э.ИМАНАЕВ.
Изиж годым…
…ача деч посна 7 ияш кодын
…шужен колымо деч шÿйшö пареҥгым кочкаш логалын. Уло ял калык дене пасушко шошым изи-влакат погаш коштыныт.
…7-ше классыште кок предмет дене гына нылытан лектын, молыжо – «визытан».
…3-шо классыште кок ий тунемаш логалын – малярий дене черланымылан кöра.
