Кугече арня

Эльвира Терентьеван фотожо.

Шошо пайремын эн кугу пайремжылан Кугече шотлалтеш. Тений ты пайрем арня 12 гыч 21 апрель марте шуйна.

Пытартыш жапыште марий-влак Кугечым шот-радам дене утыр эртараш тӱҥалыныт. Марий кундемын шуко ялыштыже илыше-влак кугезына-влак деч куснен толшо йӱлам ондакат шуктеныт да кызытат шуктат.

Кугече пайремын ятыр символжо уло. Эн ончычак – чӱчкен лекше кече. Марий-влакын Кугечышт кугарнян гын, сандене тыгай сылне пӱртӱс сӱретым кугарнянак онченыт.

Тыгак муно нерген ойлыман. Тудым, пайремым сӧрастараш манын, ожнысекак чиялтат. Йошкар-Оласе «Марий кумалтыш» общинын тӱҥ онаеҥже Ю.Д.Тушнурцевын мутшо почеш, муным чиялтыдеат лиеш.

Кугече годым муно дене кылдалтше ятыр йӱла аралалтын. Тудым курыкан вер гыч мунчалтен колтеныт. Тидыже порсын лӱҥгалтышын кава гыч волташ ышталтын.

Вет марий-влак Кугече годым у лӱҥгалтышым ыштен келыштареныт. Молан? Лӱҥгалтыш йыр калык моткоч шуко погынен кертше, да чыланат лӱҥгалтышт манын, тудым кумда верыште сакалтеныт. Тидыже тыглай лӱҥгалтымаш огыл, тыге кугезына-шамыч уржа-сорла водыжым тарваташ шоненыт. Мыняр кӱшкырак нӧлталтыныт, тунар шукырак шурным налына манын, ӱшан дене иленыт.