21 апрельыште Марий Элым Вуйлатыше Ю.Зайцев калыклан транспорт дене кудалышташ сай йӧным ыштыме шотышто совещанийым эртарен.
Тӱҥ докладым регионысо Минтрансым вуйлатыше Андрей Герасименко лудын. Тудо Йошкар-Олаште транспорт чарныме вер-влакын могай состоянийыште улмышт нерген каласкален. 2024 ийыште 352 тыгай вер шотышто иктешлымашым ыштыме. Тылеч вара ола администраций планым ыштен: 13 остановкым ачалаш, транспортыш шичме 29 верым уэмдаш, 55 у платформым да чарнен шогалме 130 верым («заездный карман») ышташ.
Тыгак совещанийыште светофорым, корно-влак ушнымаште стрелкан да мӧҥгешла шотлымо ешартыш секций-влакым ыштыме нерген мутланыме. У объект-влакым шындымаш да нунын пашаштым саемдымаш корно туткарым шагалемда да общественный транспортлан писынрак кудалышташ полшышаш. Планыш 7 корнывож логалын, нунын коклаште – савыртышан ик корно. Пашам МВД-н Марий Элысе Госавтоинспекцийже дене пырля шукташ палемдыме.
Корно знакым да ешартыш табличке-влакым келыштарыме шотыштат каҥашыме. А.Герасименкон мутшо почеш, общественный транспорт чарныме верыште еҥ-влак шке машинаштым кодат, а тидыже ДТП-ыш конден кертеш. Тыге ынже лий манын, Йошкар-Олаште «Остановка запрещена» да моло знакымат пижыкташ темлен.
Тыгак совещанийыште единый парковкым ышташ кӱлмӧ нерген мутланыме. У сынан да транспорт инфраструктуран парковочный системым шыҥдараш планыште уло. Чыла тидыже рӱдолаште илыше да уна-влаклан транспорт шотышто лӱдыкшыдымӧ верлам ышташ полшышаш.