Кушкыжмын Кугыжаныш Погынын депутатше-влак республикысе транспорт да корно озанлык министр А.А.Герасименко дене вашлийыныт. Вуйлатышылан ятыр йодышлан вашмутым пуаш логале.
Йошкар-Олаште – рӱдолаште
Шуко йодыш лектеш Йошкар-Оласе транспорт да маршрут-влак шотышто. Икымше: маршрутко ден троллейбус-влак кастене кудалыштмым ондак чарнат. Тыге еҥ-влак 21 шагат деч вара мӧҥгышкышт такси дене веле логал кертыт. Тиде нелылыкым луктеш. Ты йодышым мучаш марте шукташ темлыме.
Вес йодыш: Йошкар-Олан Медведево посёлко воктене верланыше 9 В микрорайоныштыжо илыше-влак дек маршрутко уке. Я.Крастынь урем марте йолын лекташ логалеш. Министрын умылтарымыж почеш, тений Черняков уремыште чоҥымо пашам мучашлат да воктенысе Некрасов уремым тӧрлышаш улыт. Тунам шыжылан тышкат автобус-влак кудалышташ тӱҥалыт.
Ширяйково кундемыш вашке автономный троллейбус-влакым (тяговый аккумулятор батареян, зарядкан) колтышаш улыт. Уке гын тушкыла кудалыштше 8 №-ан маршруткыш южгунам логалашат ок лий.
Троллейбус-влак Изи Какшан эҥер вес могырно чоҥен шогалтыме у районлаштат кудалышташ тӱҥалыт. Тыге Мирный, Молодежный, Спортивный, Восточный районлаште илыше-влаклан куштылгырак лиеш.
Мыняр минут гыч толеш?
Лач тидым увер табло гоч пален налаш лиеш. Тачылан Йошкар-Олаште общественный транспорт чарналтышлаште (остановкылаште) 17 тыгай табло уло. Тений эше 15 таблом пашаш колтышаш улыт. А вара тыгайже ола мучко 80 лийшаш. Транспорт коштмо жапым Интернетыште тӱрлӧ приложенийыште (Умный транспорт Йошкар-Ола да молат) муаш лиеш.
Тошто дене шер темын
Транспорт кажне ийын тоштемеш. Кызыт 146 троллейбус уло, тушеч 82 процентшым (120 единицым) вашталтыман, вет нунын кокла ийготышт 29 ийыш шуэш. А тыгайыште телымже могай чот йӱштӧ… Садлан кажне кечын лач 85 троллейбус веле рейсыш лектеш.
2021 ийыште финанс лизинг схеме почеш Йошкар-Ола администраций 238 миллион теҥгелан 10 чапле троллейбусым налын. Шийвундын икмыняр ужашыжым Марий Эл Правительстве пӧртылта.
А районлаште могай сӱрет?
Шуко райрӱдыштӧ автовокзал уке, садлан еҥ-влаклан йӱраныштат, чот шокшыштат транспортым уремыште вучен шогаш верештеш. Ты йодышымат лишыл жапыште кӱлешынак ончен лекташ шонат.
Курыкмарий район гыч депутат-влак Йошкар-Ола-Козьмодемьянск автобус маршрут шотышто тургыжланен ойлышт. Рӱдола гыч тушко шагал автобус кудалыштеш, пытартышыжат эсогыл 13 шагат эрталтенак кая. А вет еҥ-влак Йошкар-Олашке эмлымверыш монь толыт. Ты марте шке пашаштым чылан ыштен огыт шукто, студент-влакат каныш кечылан занятий деч вара веле каен кертыт. Шукыж годым автобусыш огыт шукто. Садлан рейсым шеҥгекырак кусараш йодыт. Тидын шотышто кызыт перевозчик дене мутланымаш кая. Весе: Курыкмарий районышто Картук корно тураште (тушто эше Акпарслан памятникым шогалтыме) корно икмыняр ужашлан шелалтеш. Тушто электричествым ышташ кӱлмым палемдышт, уке гын пычкемышыште корным ужын шукташ нелырак.
Морко районышто сайлыше-влак Морко посёлко гыч Красный Стекловар марте автобус рейсым йодыт. Тиде йодышым депутат Н.Пушкина нӧлтале. Но тышкыла еҥ шагал кудалыштмылан кӧра ты йодышым решатлаш нелырак лиеш. Перевозчик парышым кондыдымо верыш автобусым ынеж колто. Тидлан посна кугыжаныш программылашке ушнаш кӱлеш, вет таче шуко ялышке еҥ шагаллан кӧрак автобус ок кудалышт.
Марла увертарат
Ынде Йошкар-Оласе кӱртньыгорно ден автовокзалыште маршрут-влакым марла увертарат. Тидымак палемдыш марий депутат Лариса Яковлева. Тиде сай увер. Кеч Марий Элыш толмо гай чучеш.
Йошкар-Олаште у автовокзал (Ленин проспект, 4а адрес дене верланен, Киров урем тураште) 2021 ий гыч пашам ышта. Тачылан кажне кечын тушеч тӱрлӧ верыш да кундемыш 65 маршрут дене 258 автобус тарвана.
Икмыняр у маршрут почылтшаш (кызыт конкурс эрта):
-
№ 6-П «Руэм посёлко – Савино»;
-
№ 7-П «Новый посёлко – Йошкар-Ола, Туруново-3»;
-
№ 10-П «Медведево – Семёновка села, Интернатский урем»;
-
№ 2А «Мясокомбинат – Я.Крастынь урем»;
-
№ 4А «Туруново-3 — Я.Крастынь урем»;
-
№ 5А «Мышино урем – Галавтеев урем (Звёздный микрорайон)».
Республикысе бюджет кӱшеш (31,3 млн теҥге) шым у маршрут ямдылалтеш:
-
Волжск ола – Нӱлмарий (Кленовая Гора) посёлко;
-
Йошкар-Ола – Кугенерка ял;
-
У Торъял – Шернур;
-
Йошкар-Ола – Пектубаево села – У Торъял (Шемшӱргӧ гоч);
-
Йошкар-Ола – Кузнеч ял;
-
Йошкар-Ола – Марий ушем ял;
-
Йошкар-Ола, Луговой урем – Медведево, Медведево шӱгарла.