Параньга район Элпанур ялыште кок пачашан школ йошкар тӱсшӧ дене торашке волгалтеш. Тудым 2019 ийsint пайремлын почмо. Вес ийын февральыште тидлан куд ий темеш. Сандене ты кундемыш мийымеке, школ илышым пален налме шуын. Мемнам омсаште тушто директорлан тыршыше Г.Г.Князев вашлие.
Шӱдӧ наре йоча
Кызыт тиде мотор школыш 93 икшыве коштеш. Тений икымше классыш кандаш йоча толын. Вес ийынат тынарымак вучат.
Кодшо ийын 11 выпускник лийын. Тышеч иктыже, Ксения Головина, йошкар аттестат дене тунем пытарен. Кызыт 9-ше классыште 9 йоча тунемеш. А эн кугу классыште 14 еҥ шинчымашым пога.
Туныктышо-влак ситышын улыт. Но вузым гына тунем лекше у специалист ты школыш шукертак толын огыл. Сандене эн самырык туныктышо 30 утла ияшрак. Тӱҥ шотышто пенсийыш шушо да сулен налме канышыш лекше педагог-влакат тыршат.
Школ коллектив кугужак огыл: чылаже 25 еҥ пашам ышта, тышеч латкумытшо – туныктышо.
Шуко шӧрынан еҥ
Геннадий Григорьевич вуйлатыме сомылым шуктымыж нерген тыге мане:
– Мо оҥайже: ты пашам 2015 да 2016 ийлаште пел ий дене шуктенам. Вара 2019 ийыште адакат директорын сомылжым ӱшанышт. 2021 ий апрельыште школ директор сулен налме канышыш кайыш, тылеч вара мыйым шогалтышт.
Шкеже Оршанке педучилищым тунем пытаренам, тӱҥалтыш класслам да изосымыктыш предметым туныктышо улам. Эн ончычак Матародо школышто ИЗО-м туныктышым. Ынде педагог стажем 25 ийыш погынен. Варажым информатикым туныктышылан шинчымашым погышым.
Ешарена: Элпанур школышто ик пӧръеҥ педагог гына. Садлан Геннадий Григорьевичлан ятыр предметым туныкташ верештеш. Теве тений гыч «Основы безопасности и защиты Родины» у предметым пуртымо. Тудым военнобязанный еҥ туныктышаш манын каласеныт. А тыгайже школышто Геннадий Григорьевич гына. Сандене тидын шотышто курсым эртен да кызыт ты предметым, информатикым, рвезе-шамычлан трудым туныкта.
Ятыр мероприятий
Ӱдыр-рвезе-влакым тӱрлӧ мероприятийыш директорын воспитатлыме паша да йоча ушем-влак дене кылым кучымо шотышто советникше Я.В.Алексеева чумыра. Такшым Яна Валерьевна эше школышто музыкым туныкта. Советникын кабинетышкыже ончалаш мийыме годым лачак воктенысе классыште йоча-влак дене пырля мурым тунемыт ыле.
Спорт дене кылдалтше таҥасымашлам физкультурым туныктышо Надежда Михайловна Шишкина эртара. Тудо йоча-шамычым районысо кажне ӱчашымашке коштыкта. Вет тысе тунемше-влак утларакшым спортышто сеҥымашым ончыктат.
Советник ден физкультурым туныктышо ятыр сомылым директорын воспитатлыме паша шотышто алмаштышыже Галина Юрьевна Мамаева дене пырля ворандарен шогат. Мутат уке, тӱшкан шонымо мероприятийже оҥайынак лектеш.
Тӱрлӧ сомыл
Моло семынак Элпанур школышто 1-4-ше класслаште тунемше-шамыч шокшо кочкышым оксам тӱлыде кочкыт. Тыгак шуко шочшан ешысе йоча-влакым кок гана пукшат, нунат тидлан оксам огыт тӱлӧ. А икшыве-шамыч деч тысе повар-влак тамлын шолтат мо манын йодмылан «Тамлын» манын пелештышт.
Ача-ава-влак икшывыштлан школышто кочкаш тылзеш 1500 марте теҥгем пуат. Моло вереат ак тыгаяк.
Кызыт ончычсо семын школ кугу пакчам ок кучо. Изирак участкыштышт труд урокым эртараш, ӱдыр-рвезе-влакым иктаж-могай пашалан туныкташ тыршат.
Икмыняр ий ончыч «Цифровая образовательная среда» федеральный проект почеш Элпанур школлан кок интерактивный комплексым пуэныт. Тушко кок интерактивный доска деч посна 39 ноутбук пура. Чыла тидым информатике ден англичан йылме кабинетлашке вераҥдыме. Тыгак шым ноутбук дене советникын кабинетыштыже тӱрлӧ сомылым ворандараш кучылтыт.
Интернет Элпанур ялыште сайын пашам ышта. Сандене тидыже моткоч йӧнан. Икманаш, тиде школышто чыла пашажат икшырымын да радам дене шукталтеш.
Эльвира Терентьева.
Авторын да И.Речкинын фотошт.