Морко посёлкысо 1-ше номеран школышто тунемше Ульяна Григорьева тӱрлӧ мероприятийыште шке мастарлыкшым ончыктымыж дене ойыртемалтеш.
Кызыт ӱдыр 10-шо «А» классыш коштеш. Мо оҥайже: тукымыштыжо руш, марий да корей-влакат улыт. Аваже корей тукымвожан. Коваже Корейыште шочын, варажым ешыж дене тудо Моркыш илаш толын, киоскым почын да моло пашамат шуктен.
Ульяна скрипке дене кандашымше ий шокта. Кажне тунемме ийыште посна выступатлышаш вич-куд произведенийым тунемеш. Тылеч посна ансамбль да хор дене тӱрлӧ номерым пырля ямдылат. Ӱдыр пытартыш жапыште еҥ-влаклан Нур Даутовын «Одиночество» ден Джеймс Ластын «Одинокий пастух» композицийыштым шокта. Тылеч ончыч марий семымат тунемын да йоҥгалтарен. Шулен колыштат!
Скрипкым шоктымаште ятыр сеҥымашыш шумыжлан кӧра 2022 ий сентябрь-октябрьыште «Артек» йоча рӱдерыш миен толын. Ты жапыште музык дене кылдалтше отряд лийын огыл, сандене У.Григорьевам МЧС отрядышке налыныт. Ульянан шонымыж почеш, «Артекыш» кажне чолга еҥ логал кертеш. Ты шотышто ӱдырлан аваже полшен. Чыла грамотшо ден дипломжым рӱдерын сайтышкыже колтен. Тыге шочшыжлан куан шыргыжалын.
Ульяна Григорьева шкаланже вузым да илыш направленийым пеҥгыдын ойырен налын огыл. Тудо спортыштат шкем терга, волейбол дене модеш, куржталаш йӧрата, спортын моло видше денат заниматлаш кумылан.
Григорьевмыт ешыште кок ӱдыр кушкеш. Ульянан акаже кызыт Москошто Российысе туризм да сервис университетыште унагудо бизнеслан тунемеш. А Ульяналан ончыкылык профессий нерген шоналташыже эше ик идалык уло. Кеч-могай профессийым ойырен налеш гынат, ныл кылан семӱзгарже эре пеленже лиеш да йокрокланымыж годым полша манын ӱшана.
Эльвира Терентьева.
Авторын фотожо.