У ий марте тылзе наре веле кодеш. 2023 ий Кроликын (Пырысын) идалыкше лиеш. Садлан кролик сынан салатым ышташ темлена.
Кӱлыт: 160 г чыве шыл (шолтыман але жаритлыман), 4 шолтымо муно, 120 г мариноватлыме кияр, 100 г шере пурыс, 120 г пеҥгыде сыр, 80 г майонез, 1 шолтымо кешыр (сӧрастараш), 3 маслине, специй ден шинчал – там почеш.
Кок муношым да изишак муноптемым посна кодыза. Моло муным, чыве шылым, киярым да пурысым кубик семын падыштыза.
Тарелкаш эн ончыч чыве шылым пыштыза да кролик вуй формым пуыза. Вара – шинчалтыме киярым, тудын почеш – муным. Вес лончо шере пурыс лиеш. Вара – тёрко гоч нӱжымӧ сыр. Сырым ӧрдыжышкат шавалтыза.
Кажне лончыш майонезым йыгыман.
Кешырым, муношым тыгыде тёрко гоч нӱжыза. Салат ӱмбак да ӧрдыжкӧ майонезым изиш йыгалтыза, муношым шавалтыза. Кролик пылыш тураш кешырым пыштыза. Кодшыжым майонез дене варыза да бантикым ыштыза.
Маслине гыч шинчам, нерым ыштыза, пурыс пӱчкыш дене – умшам. Нер воктене чурий начкалан муноптемым оҥго семын шавалташ лиеш, ӧршым укроп укш дене келыштарыза.
Майонез олмеш ӱмбалым але натуральный йогуртым кучылташ лиеш. Але майонез ден ӱмбалым (але йогуртым) пелыгыч налын вараш лиеш. Тунам салат шуко калориян огеш лий.