Волжск оласе Ленин уремыште верланыше пӧртын ик подъездше гыч, тросым пӱчкын, кок велосипедым шолыштыныт. Иктыже 10000 теҥгеаш лийын, весыже – 9000 теҥгеаш.
Йошкар-Олаште 27 ияш ӱдыр уремыште рвезе дене палыме лийын. Олан уремлаж дене эртеныт. Ӱдырын шергакан телефонжым ужынат, рвезе тудым кидше гыч солалтен куржын. Шолыштшым, ондак судитлалтше 27 ияш рвезым, кученыт.
Йошкар-Олаште илыше 48 ияш пӧръеҥ интернет-кевытыште шергакан йолчиемым заказатлен. Сатум почтышто налогым тӱлен налын. Тушто шулдо акан кроссовко да кагаз лийыныт.
Морко районысо ик автозаправке гыч Йошкар-Оласе банкыш 5000 теҥгеаш шоя окса логалын. Тидын шотышто тергымаш паша кая.
Оршанке районышто илыше 52 ияш пӧръеҥ банк картшым йомдарен, но банкыш йыҥгыртен блокироватлен огыл. Картым ты район гыч 41 ияш пӧръеҥ муын да командировкыш кайымыж годым автозаправкылаште тудын дене тӱлен. Тыге 12 тӱжем теҥгем кучылтын пытарен.