Кримувер

Йошкар-Оласе ик кевыт гыч кум пӧръеҥ аракам да пÿйым мушмо щёткым шолышт лектын. Ик жап гыч нуным полиций пашаеҥ-влак Первомайский ден Водороводный уремла ушнымаште ик кудывечыште кученыт. Делам почыныт.

Йошкар-Олаште илыше 64 ияш ӱдырамаш самырык рвезылан пачерым айлаш пуэн. Тудыжо оксам кастене тӱлаш сӧрен. Озавате кастене оксалан толын, а рвезе лийын огыл. Тылеч посна пачерыште вургем мушмо машине ден элекроплита лийын огытыл. Титакан рвезым кученыт. Мушмо машинам комиссионный кевытыш сдатлен улмаш.

Кужэҥер районышто илыше 44 ияш ӱдырамашлан мошенник-влак банк пашаеҥ улам манын йыҥгыртеныт да картше гыч оксам шолышташ тӧчымӧ нерген увертареныт. Ынышт шолышт манын, оксам телефон дене ойлымо банк счётыш колташ темленыт. Тыге ӱдырамаш 159 тӱжем теҥге деч посна кодын.

Курыкмарий районышто 31 ияш ӱдырамашын мончаж гыч бензопилам шолыштыныт. Титаканым муыныт. Бензопилам ты кундемысе 37 ияш пӧръеҥ шолыштын, ужалаш шонен.

Килемар районысо Визымьяр посёлкысо илыше кок пӧръеҥ 17 апрельыште шке ыштыме пуш дене колым кучаш Юл эҥерыш каеныт. Вес кечын эрдене сер воктене нунын вургемыштым верештыныт. 20 апрельыште Марий аварийно-утарыше службын пашаеҥже-влак 3-4 метр келгытыште кок капым муыныт.