Медведево районышто илыше 59 ияш ӱдырамаш Интернетыш мландым ужалыме нерген уверым луктын. Ик жап гыч озаватылан ик ӱдырамаш йыҥгыртен да мландым налаш кутырен келшеныт. Вес кечын пӧръеҥ саде ӱдырамашын пелашыже улам манын ойлен. Карт номержым йодын да пел акшым колташ сӧрен. Уэш йыҥгыртымыж годым шукырак оксам колтен манын да пӧртылташ йодын. Ӱдырамаш чыла йодмым шуктен, вара иже ондалалтмыжым умылен.
Волжск олаште илыше 59 ияш пӧръеҥ Интернетыште компьютерым ужалыме нерген уверым ужын. Ужалыше дене кутырен келшен, 33 тӱжем теҥге оксам банк картышкыже колтен. Тиддеч вара ужалыше дене кыл йомын.
Йошкар-Оласе Матросов уремысе ик пӧрт воктене шогышо автомобиль гыч видеорегистраторым шолыштыныт.
Оршанке посёлкышто илыше 33 ияш ӱдырамаш банк картшым йомдарен. Ик жап гыч картше гыч 8500 теҥге йомын. Шолыштшым муыныт. Тылеч ончыч ӱдырамаш такси дене толын улмаш, да машинаш картше лектын возын. Машина оза картым муын, но пӧртылтен огыл.