Параньга районышто 43 ияш ӱдырамаш шке пӧртшым ужален да тидым йолташыже-влак дене пошкудын пӧртышкыжӧ палемдаш каен. Пӧртым ужалыме оксажым да шӧртньӧ ӱзгар-влакым пеленже налын. Тыге 230 утла тӱжем теҥге окса да шӧртньӧ ӱзгар-влак йомыныт. Титаканым кученыт. Оксам пошкудо ӱдырамашын, шукерте огыл тюрьма гыч лекше марийже шолыштын улмаш.
Медведево районышто илыше 21 ияш рвезын 6 июньышто йӱдым машинаж гыч усилительым, кок динамикым, документ-влакым да шапашужашым шолыштыныт.
Йошкар-Оласе Йыван Кырла уремыште тыгаяк ситуаций тудо йӱдымак лийын. ВАЗ-2109 машина гыч сабвуферым (акустический системе) налын каеныт.
Шернур районышто илыше 35 ияш пӧръеҥ Интернетыште тӱрлӧ сайтлаште кредитым налаш йодмашым коден. Икмыняр жап гыч банк пашаеҥ улам манын йыҥгыртеныт. Кредитым налаш манын, 40 тӱжем утла теҥге оксам колтен. Икмыняр жап гыч веле аферист-влаклан оксам колтымыжым умылен.
Советский районысо ик ялыште илыше 17 ияш рвезын кӱсеныштыже мартыште 14 грамм наркотический веществам муыныт. Дознаватель уголовный делам петырен. Ты делам судыш колтеныт.
Марий Турек районышто илыше 21 ияш ӱдыр интернет-кевытыште курткым налаш шонен. Но сатум ончылгоч тӱлаш кӱлын. Ӱдыр ужалыше дене мутланен, 3000 теҥгем банк картышке колтен. Тылеч вара ужалыше вашештымым чарнен.