19 январьыште православий юмын йӱлам кучышо-влак Крешеньым палемдат.
Таче йӱдым Йошкар-Олаште Изи Какшан эҥер гоч пыштыме вантовый кӱвар воктенысе вакыште 500 утла еҥ чывылталт лектын.
Йошкар-Оласе округ администрацийын гражданский обороно да чрезвычайный ситуаций паша шотышто управлений пашаеҥ-влакын мутышт почеш, чрезвычайный ситуаций эҥер сер воктене лийын огыл.
Крешене купельыште таче 20 шагат марте йӱштыл лекташ лиеш. Йӱштылмӧ верыште медик да утарыше- влак дежуритлаш тӱҥалыт.