Коважын шонымашыжым шуктен

Декабрь кыдалне Марий Элысе балетный школ ший лӱмгечыжым, 25 ий теммым, палемдыш. Лачак тынар ий ончыч Йошкар-Оласе Бауман лицейыште И.С.Палантай лӱмеш тӱвыра да сымыктыш колледжын хореографий пӧлкажым почмо. Таче тусо выпускник-влак уста артист улыт.

Лӱмгече вашеш Э.Сапаев лӱмеш опер да балет театрын сценыштыже кок актан чапле концертым ончышна. Тӱрлӧ ийысе выпускник-шамыч шке мастарлыкыштым устан ончыктышт. Кажне артисткын сӧралын куштен моштымыжлан тауштымо шуэш. Нунын коклаште ик шӱдыржӧ – Йошкар-Ола гыч Полина Казакова. Тудо колледжым 2020 ийыште тунем лектын. Ты корныш толмыжат оҥай. Тидын нерген Полина тыгерак каласкалыш:

Мый театрыште визымше ий пашам ыштем, тылеч ончыч кандаш ий тунемынам. 2012 ий 1 июньышто мый лагерьыште каненам. Тунам ковам балетный школыш тунемаш налаш тӱҥалме нерген каласен. Тиде мыланем йӧршеш вучыдымо увер лийын. Авам мыйым налаш толын да Шкетан лӱмеш театрыште эртышаш экзаменыш наҥгаен. Тунам балет нерген нимом пален омыл. Мыйым налмылан куаненам манын ом керт, мӧҥгешла, чотак шорташ тӱҥалынам. Тунам художественный гимнастикыш коштынам, сандене ты шонымаш дене иленам.

Полинан коваже, Татьяна Юрьевна, балетым моткоч йӧрата. Самырыкше годым шкеже балерине лияш шонкален. Икмыняр ий ончыч тудо креативный профессий-шамычлан туныктышо «Арт-Виза» школ-студийым почын. Варажым ӱдыржым (Полинан аважым) ты профессий дене виктараш толашен. Лачак уныкажым балерине лийме корныш шогалтен кертын.

Балетыште куштымо паша Полиналан кугу тергымаш лийын:

Хореографий ден классический куштымаш куштылгын пуалтыныт гынат, мый тидым йӧратен омыл. Сандене кажне ийын каяш шонен коштынам. А кунам балетын артистше семын сценыш ик-кок гана лектым, тунам мыланем чылажат келшаш тӱҥале. Сценыш эре лекме шуын, куан шӱлыш авалтен. Ынде тиддеч чот сай паша укеат, шонем.

П.Казакова Балетный школын 5-ше классыштыже улмо годым «Василиса Прекрасная» балетыште Ияиге-влак рольышто икымше гана куштен. Тунам пырля тунемше-шамыч дене спектакль мучко тӧрштылыныт. Тачат тиде тургыжланымашым шижеш.

Полина «Весна священная» (И.Стравинский) балетыште Избранницым куштымыжлан куанымыже да тидым шке репертуарыштыже ик эн сай спектакльлан шотлымыж нерген ойлыш. Тиде тӱҥ рольым сценыш луктын кертмылан моткоч йывыртен, ятыр жап тидлан ӱшаненат огыл, сандене пиалан улмыж дене пайлалте. Театрын репертуарыштыже улшо спектакль кокла гыч чӱчкыдынак «Золушкам» ончыктат. Тушто артистке Золушкан Злюка манын лӱмдымӧ акажын рольым модеш, тыште тудлан весела кумылымат, осал койыш-шоктышымат почын пуыман – тыгайже Полиналан путырак келша.

Спектакльлаште ончыл да шеҥгел линийлаштат кушта гынат, чыла тидлан ӱдыр таушта. «Сценыш кажне гана лекмаш ойыртемалтше лиеш, сандене тидлан вий-куатым мумым кугу сеҥымашлан шотлем», – мане мучашлан артистке.

Эльвира Терентьева.

Е.Никифоровын фотожо.