Кугезе ковам ялыште фельдшерлан шуко ий ыштен. Ялысе калык тудым чот пагален, чӱчкыдын полышым йодын миен. Тыгак Елена ковай тӱрлӧ шудо дене эмлен моштен. Икана тудо ковам деке йыҥгыртен да лишыл жапыште шкеж деке мияш шӱден. Тунам Зина ковам коло ийым эрталтыше самырык ӱдыр лийын, олаште пашам ыштен.
Зинан толын шумыжлан Елена ковай черле киен, вакшыш гыч кынелынат огыл. Чеверласыме семын ӱдыржын кидшым чот кормыжтен да уэш-пачаш иктым ойлен:
– Вӧдырым ит кодо, тудым шке декет наҥгай.
– Кӧ тыгай Вӧдыр? Пырыс мо?
Но кугезе ковам шинчажым петырен да тетла ик шомакымат пелештен огыл. А кастене шӱмжӧ кырымым чарнен.
Аважым поген пыштымек, Зина корныш погынаш тӱҥалын. Ушыж гыч пытартыш шомакше-влак лектын огытыл. Тудо аважын йолташ ӱдыржӧ Клавий кокайлан тидын нерген ойлен. Илалше ӱдырамаш Зинам шкеж деке ӱжын да каласен:
– Ӱшанет але уке, аватын суртводыжшо ыле. Тудын лӱмжым тылат каласен гын, тугеже пелен наҥгайыде ок лий. Коҥгамбалныда тӱрлеман ош портышкем лийшаш. Тудым тушеч волто да Вӧдырым пеленет каяш ӱж.
Тыгайым колмек, Зина шыргыжалын гына. Кастене малаш возын, а йӱдым омсам пералтыме йӱкеш помыжалтын. Иктаж пошкудо толын дыр манын ончалаш кынелын, но тушто нигӧм ужын огыл. Тыге икмыняр гана лийын. Ӱдыр йӱдвошт мален огыл, чонжылан шучкын чучын.
Эр велеш коҥгамбач ош портышкемым волтен да пелештен:
– Вӧдыр, мый тыйым пырля каяш ӱжам.
Ты портышкемым ковам олашке наҥгаен. Вара тудын дене кылдалтше шуко оҥай историйым каласкален. Тыге портышкем ондакысе келшыме рвезыжын вуйышкыжо икмыняр гана камвозын улмаш. Вӧдыр шотдымо таҥым поктен колташ полшен манын, ковам шыргыжалын ойла ыле.
Суртводыж чынжымак уло але укем раш каласен ом керт, но у пачерым налмек, ковам мыламат тӱрлеман у портышкемым пӧлеклен.
Екатерина.
Медведево район.