
Курчак театрыште кажне спектакль да репетиций костюмым, йолчиемым, курчакым да моло реквизитым ончылгоч ямдылыме гыч тӱҥалыт. Ты пашан «озажат» уло. Тиде – Марий Эл Республикысе тӱвыран сулло пашаеҥже Зинаида Ларионова. Тудо костюм да реквизит цехлам вуйлата. Сандене кушто мо верланымым сайын пала.
Ятыр ий – театрыште
Зинаида Романовна У Торъял район Какшанмучаш селаште шочын. Вара ешыж дене Йошкар-Олаш илаш куснен. Тушто 13-шо №-ан школым тунем пытарен. Изирак класслаште спорт дене пеҥгыде кылым кучен. Кугурак класслаште театрым йӧратен шынден.
– Ешем усталык шӱлышан, манаш лиеш. Авам мураш йӧратен, ачам гармонь дене сайын шоктен. Нунак марий литератур деке кугу йӧратымашым луктыныт. Сандене пьесе-влакым, рольым шеледен, чӱчкыдын лудынна. Эреак Шкетан лӱмеш Марий национальный драмтеатрыш спектакльым ончаш коштынна, – шарналта З.Ларионова.
Зинаида Романовна Курчак театрыште 1973 ий годсек тырша. Ондак бухгалтерийыште кассирын сомылжым шуктен, кадр отделыштат ыштен, а 2002 ий годсек костюм цехым вуйлата. Тудо театрым моткоч сайын пала да тӱзланен вашталт толмыжлан куана гына. Шке пашаж нерген тыгерак каласкала:
– Мый дечем посна ик спектаклят огеш тӱҥал, вет мыйын тӱҥ сомылем – вургемым да курчак-влакым ончылгоч терген лекташ да ямдылаш. Иктаж-могай ситыдымашым муам гын, цехлаш тӧрлаташ наҥгаен пуэм. Чыла сай гын, сцене деке наҥгаен оптем. Икманаш, актёр-влакын чыла кид йымалнышт лийже манын тыршем.
Спектакль пытымеке, кораҥден пыштем. Кажне курчакын шке верже уло, нуно лӱмын ыштыме гребёнкышто верланат. Моло реквизит – посна ячейкылаште.
Кид монден огыл
Спектакль жапыште курчак дене пашам ыштыме годым кид огеш сите гын, актёр-влак Зинаида Романовнам полшаш йодыт. Тиде арам огыл, вет ӱдырамаш ты пашам пала. Тудо школ деч вара Курчак театрыште ешартыш составыште модын.
– Икана газетыште Курчак театрыш тыгай составыш тунемше-влакым погымо шотышто уверым ужынам. Мыят каяш кумылаҥынам. Экзаменым сайын кучымек, вигак гастрольыш колтеныт. Ме тунам йоча пионер лагерьыш коштынна. Икымше гана Таирыште «Приключения Пифа» спектакльым ончыктенна. Тушто мыланем рвезым модаш кӱлын. А тудо койыш-шоктышыж дене мыланем йӧршеш келшен толын огыл. Сандене нелылык лектын, театр гыч каяш шонымашат лийын. Но опытан актёр-влак мылам полшеныт: йӱкым кузе шындаш, шкем кузе кучаш туныктеныт.
Гастроль дене Ереван олашкат (Армений) миенам. Театрлан кӧра шуко элыште лияш пиал шыргыжалын.
Но шкем чаманыде пашам ыштымылан кӧра йӱкем йомаш тӱҥалын, сандене актёр пашам кодаш логалын. Лач кызыт, кунам кӱлеш, полышкалем. Ты сомылым кидем эше монден огыл, – палемда З. Ларионова.
Могай спектакльлаште Зинаида Романовна модын, кызыт нуно огыт шындалт. Туге гынат эртыше пагыт нерген шарнымаш ила да кажне гана шӱмым ырыкта.
З.Ларионова Йошкар-Олаште ила гынат, мланде пашалан моткоч шӱман. Сандене ола воктене участкым налын. Тушто тӱрлӧ пакчасаскам, пеледышым кушта. А яра улмыж годым пидаш да тӱрлаш йӧрата.