Коронавирусым чактарыман

Марий Элыште коронавирус инфекций дене черланыше-влак огыт шагалем. Республикыште 11 инфекционный стационар пашам ышта. Ковид молгунамсе дене таҥастарымаште эшеат «самырыкештын». Кызыт ты чер дене йоча-влакат (эсогыл аза-шамыч) нелын черланат. Тидын нерген Марий Эл Республикысе тазалыкым аралыме министр М.Панькова каласкален. Тудо ушештарен: кугыеҥ-влак прививкым ыштат гын, черлан шарлаш йӧн ок лий, йоча-шамычат аралалтыт. Тыгак Мария Викторовна моло йодышымат рашемден. 

60 ИЯШ ДЕЧ КУГУРАК-ВЛАК

Ты ийготан еҥ-влакковид дене ончычсо семынак эн чӱчкыдын черланат да колат. 800 колышо еҥ гыч 90% еҥже 60 ияш деч кугурак лийын. Але марте тиде ийготан еҥ-влак коклаште 41% веле прививкым ыштыктен.

САМЫРЫК-ШАМЫЧ

Стационарлаште 10-15% эмлалтше – 30 ияш марте еҥ. А ты тӱшкаш пурышо 30% еҥ веле вакциным ыштен. «Черым куштылгын эртарыше ӱдыр рвезе-влаклан прививкыш каяш темлена. Тыге нуно ача-аваштым, коча-коваштым да моло лишыл еҥыштым чер деч арален кодат. Мутат уке, ик вакцинат чер деч тичмаш арала манын огына керт, туге гынат эмлымверлаште шӱлаш полшышо аппарат дене пайдаланыше-влак коклаште прививкым ыштыше укеат», – ойла М.Панькова.

АНТИТЕЛА УЛО ГЫН

Организмыште антитела-влак улыт гынат, прививкым ыштыме дене нимо удажат ок лий, мӧҥгешла, чотрак аралалташ йӧн лектеш. Тылеч посна тазалыкым аралыме министр коронавирус да грипп ваштареш прививкым иканаште шындаш лийме нерген каласен. Ты кок вакцине капын тӱрлӧ ужашышкыже ышталтеш. Тыгак аллергий шотышто йодыш тарванен. Таче марте республикыште илыше 50% утла еҥ прививкым ыштен, тыгодым иктаж-кӧн аллергий але анафилактический реакций лиймым палемдыме огыл.

У СЕРТИФИКАТ

8 ноябрь гыч коронавирус инфекций дене черланен эртарыше але прививкым ыштыше еҥ-влаклан у сынан сертификатым пуаш тӱҥалыт. А тошто сертификат-влак 2022 ий 1 март йотке чынлан шотлалтыт. Тудым «Госуслуги» порталыште я шуко функциян рӱдерыште улан вашталташ лиеш.