Марий Эл Правительстве Председательын икымше алмаштышыже Наталья Ошланован вуйлатымыж почеш Правительстве комиссийын корно лӱдыкшыдымылык шотышто заседаний эртен.
Тушто 2024 ийыште «Безопасные качественные дороги» нацпроект почеш шуктымо пашам иктешлыме.
Кодшо ийысе тӱҥ сеҥымаш-влак:
Нормативлан келыштарыме региональный ден межмуниципальный значениян, шотлан толшо корно 50,11 процентыш шуын (1 526,91 км), тидыже план деч 163,64 километрлан шукырак;
опорный манме корно сеть – 97,59 процентыш (242,05 км), план деч 31,22 километрлан шукырак;
ола агломерацийыш пурышо корно – 93,48 процентыш (222,62 км), план деч 19,42 километрлан шукырак;
искусственный сооруженийым нормыш кондымо кумдык – 2 004,9 погонный метр.
Корнысо правилым пудыртымашым эскерыше 20 фотовидеофиксаций камерым вераҥдыме. Но аварийым шагалемден кертме огыл: 100 тӱжем еҥлан шотлымаште ДТП-ште колышо-влакын показательже 9,27 олмеш 12,84 цифрыш шуын. Тидлан кӧра муниципальный образованийлам вуйлатыше-шамычлан аварийностьым иземдыме да тыгодым колышо-влак шотышто профилактике пашам ешараш темлыме; образований да науко министерствылан ийготыш шудымо йоча да нунын ача-авашт дене тыгаяк пашам виктараш палемдыме.
2025 ийыште корно лӱдыкшыдымылык шотышто икмыняр сомыл ышталтеш. Эн ончычак 562,195 км кугорнышто корнысо разметкым угыч ыштат, 1650 корно знакым да 12 км барьерный чаракым вашталтат, 22,45 км кугорным волгалтарат, 30 у фотовидеофиксаций камерым вераҥдат.
Тыгак А-295 федеральный кугорнын ужашыжым (Йошкар-Ола – Зеленодольск – М-7 «Волга» кугорно) да Изи Какшан эҥер гоч аварийный кӱварым капитально олмыктат.
Наталья Ошланован палемдымыж почеш, корно лӱдыкшыдымылыкым эскерымашын тӱҥ принципше – корнышто улшо еҥ-влакын ончыкылыкышт да тазалыкышт нерген шонымаш.
Эльвира Терентьева.