Вячеслав Элембаев визымше ий Североморск олаште теҥыз флотышто контракт почеш службым эрта. Лишыл жапыште шочмо кундемыш пӧртылаш огеш шоно.
Слава Шернур район Пекпулат почиҥгаште шочын-кушкын. Кудымшо класс марте Койсола школышто тунемын.
– Тӱҥалтыш классла гычак физкультур келшен. Мемнам Вячеслав Валентинович Бердников туныктен. Тудак спортлан шӱмаҥден. Школнан тунемшыже-влак районышто да республикыште шке вийыштым эре тергеныт, ончыл верыш лектыныт. Тиде – Вячеслав Валентиновичын суапше, – ойла рвезе.
Индешымше класс марте В.Элембаев Шернур посёлкысо 1-ше номеран школышто шинчымашым поген. Туштат тӱрлӧ таҥасымаште вийжым терген.
– Изи годсек пошкудо рвезе-влак дене ял воктене футболла модынна. Ялна чодыра воктене верланен, сандене ятыр гана икте-весым поктен шылын куржталынна, – шарналта Слава.
Школым тунем пытарымеке, рвезе Марий Турек посёлкысо Ялозанлык механизаций техникумышто «Машинист дорожных и строительных машин» специальностьым налын. Ты профессий дене пашам ыштен шуктыде, армийыш каен. 2014-2015 ийлаште Угарман областьысе Саров олаште служитлен. Армийыште улмыж годымак контрактым подписатлен да Североморск олаш илаш куснен.
– Моряк лияш шонен омыл, но илыш тиде корныш шогалтен. Тугеже тыге лийшаш улмаш, – ойла тудо.
– Армий жап кузе эртен?
– Армийыште мый шуко жапым кочмыверыште эртаренам. Кӧ-гына тушто лийын омыл. Эсогыл кочкаш шолташ логалын.
– Теҥыз флотыш каяш кӧ кумылаҥден?
– Ачам колымеке, йолташем йыҥгыртыш да теҥыз флотыш ӱжӧ. Шоналташ сӧрышым. Витя чӱчӱэм дене мутланымеке, каяш шонен пыштышым. Чӱчӱэм тидлан чот полшен. Тудо шкежат воинский частьыште ятыр ий пашам ышта.
– Шукерте огыл ешым погенат. Ешлан жап кодеш мо?
– Пелашемым да Амина ӱдырнам шуэнрак ужам, но тиде жап мыланем эн шерге. Паша деч вара але каныш кечым ешем дене эртарем. Марий мурым чӱктен, изи падырашым кидыш налын, южгунам кушталтемат. А мыскара семын йолташ-влаклан ойлем, корабль – мыйын пелашем.
– Шочмо кундемыш пӧртылаш шонымаш уке?
– Молын семын чон вургыжын вучышо ача-авам уке. Иза-акан – шке ешышт. Ковам шочмо ялыште ила, отпуск годым эре миен толаш, кертмем семын полшаш тыршем. Витя чӱчӱмыт декат миен коштам.
Илен-толын, пӧртыламат докан. Но кызыт тыште сайрак. Ешем пелен, пачерна уло, паша вер сай – илаш лиеш.
Еш альбом гыч налме фото.