15-18 сентябрьыште Озаҥ олаште «Добро.Конференция» эртен. Тушко Российысе чыла волонтёр толкынын еҥже-влак ушненыт.
Нуно «Добро.Центр» франшизмын ужашыже лияш кумылыштым ончыктеныт. Тудо волонтёр ушемын ик системыжым ышта да добровольчествын сай практике пашажым шаркала.
Конференцийыш 500 утла еҥ погынен. Тушто икмыняр площадке пашам ыштен, стратегический сессий-влак эртеныт. Мутлан, «Возможности системы ДОБРО.РФ для Добро.Центров» стратегический сессий, вузышто волонтёр-студент-влак дене кузе пашам ыштыме, пеҥгыде сообществым кузе ышташ лийме да моло нерген каласкаленыт.
Марий Эл гыч тушко вич еҥ миен. Нунын кокла гыч иктыже – Йошкар-Олаште шочын-кушшо, ПГТУ-што механик да машиностроений факультетыште магистратурышто тунемше, ПГТУ-н студентше-влакын волонтёр организацийыштын лидерже Дарья Макарова:
– 2016 ий годсек волонтёр пашам шуктем. 2019 ийыште лидер лийым. Волонтёр паша дене кылдалтше тӱрлӧ конкурсышто сеҥышыш лектынам, таумут-влакем шагал огытыл. Тыгай конференций улмо нерген тений гына пален налынам. Тушко мый икымше гана миенам. Мылам чылажат келшен. Вес регионла гыч толшо-влак дене мутланаш, опытым икте-весе дене пайлаш сай йӧн ыле. Площадкылаште спикер-влакын ойлымыштым колышташ оҥай лийын.