Коля чӱчӱн «ушан» станокшо

Йошкар-Оласе Россий Армийын тӱвыра полатыштыже маскироватлалтме сеткым пидме у цехым 12 январьыште почыныт. Тушко Николай Боголюбовын кӱчык жапыште сеткым пидаш келыштарыме станокшым вераҥденыт. Ты станоклан кӧра 40 минут жапыште ик сеткым пидаш лиеш. Такшым тыште сеткым пидме цех эртыше ийыште сентябрьыштак почылтын. Ты жапыште ший волонтёр-влак 150 утла сеткым СВО-ш пидын колтеныт.

Поро паша ушен

Тӱвыра полатыште кундемнан ший волонтёржо-влак кажне кечын лым лийде тыршат. Вет тыште эше шке кид дене сеткым пидыт. Кызыт нунылан эше «ушан» станок полша. Тудын кузе пашам ыштымыжым меат шымлышна. Кова-шамыч дене пырля сеткым пидна.

Октябрьыште ты поро пашашке меат ушненна, – мутланымашым тӱҥале Николайын Наталья пелашыже. – Шкенан салтак-влаклан иктаж семын полшышаш ыле манме шонымаш мемнам тышке конден. Пелашем учёный. Москосо ик организацийыште тырша.

Моско гыч толшо ик волонтёр, сеткым пидме пашам куштылемдаш манын, лентым пуч гоч шуйдараш лийме нерген ойлен. Элнан рӱдолаштыже сеткым тыгай йӧнлан эҥертен пидыт манын. Тыге пелашем станокым кузе ышташ лиеш, шонен муын. У ий каныш кечылаште мӧҥгыштына станокым погенна. Эн ончыч кӱлеш арверым наледенна. Вара станокым ыштенна. Тудым «Сердце матери» волонтёр мер ушемын цехыштыже вераҥденна.

40 минут – сетке ямде

Станок кузе пашам ыштымым икымше гана тыштак тергеныт. Тидлан эн ончыч бобине гыч шудо тӱсан лентым пӱчкедат. Ик сеткылан 50 ленте кӱлеш. Вара сеткым станокыш пеҥгыдын пижыктат. Сеткысе кажне квадрат пучыш пурталт шинчеш. Ленте мучашым пуч кӧргыш пӱтырат да пеҥгыдемдат. Вара тудым тура шуйдарат. Тидыжым станокым пидме годым нимогай томаша ынже лий манын ыштат. Станокыш пижыктыме лентым икмыняр еҥ ончыко шупшеш. Тыге ик минут жапыште сетке пидалтеш. Сеткысе кажне тӱрым пеҥгыдемдаш лентыште кок пӱчкышым келыштарат да шовыч семын кылдат. Тыге сетке ужар шудо гаяк кояш тӱҥалеш. А сетке пагытлан келшыше лийже манын, лӱмын келшыше тӱсым ойырат. Ты станок дене пашам ышташ шым еҥ наре кӱлеш.

Йодмаш эреак пура

Волонтёр-влак коклаште шукыжым сулен налме канышыште улшо ӱдырамаш-шамыч улыт. Каныш кечылаште полшаш кумылан-влак ятыррак толыт. Нунын ийготыштат тӱрлӧ. Тышке утларакшым тыгай еҥ-шамыч коштыт, кудыштын СВО-што нигӧшт огеш кредал. Кеч сеткым пидын, рвезе-шамычлан полшена, маныт. Нунын полышышт такшым сеткым пидмаште веле огыл, тыгак кова-влак пенсийыштын икмыняр ужашыжым материалым наледаш ойырат. Вет ик сеткылан кум тӱжем наре теҥге кӱлеш. А салтак-шамыч деч йодмаш эреак пурен шога. Теве шукерте огыл 100 сеткым йодыныт. Тидланже кумшӱдо тӱжем теҥге кӱлеш…

Маскироватлалтме сетке чот роскотан материаллан шотлалтеш. Вет салтак-шамыч тудын дене техникым веле огыл, шкеныштымат арален сеҥат. Садланак тудлан йодмаш эреак кугу. Сетке адакшым йӱлен, кӱрышталтын кертеш. Тидын дене арален кертме йӧнжӧ йомеш, – мане «Сердце матери» фондын вуйлатышыже Тамара Александровна Авгученко.

Шӱман яшлык

Цехыште волонтёр-влак оксам погаш яшлыкым вераҥденыт. Яшлык тыглай огыл, а чонан. Тудым шӱман кӧгӧн дене петыреныт. Тидыже шуктымо пашашт, погымо оксашт чон гыч лекше манмым ончыкта. Тышке толшо кажне кумылан еҥ яшлыкыш икмыняр теҥгем пыштен кертеш. Тыге сеткылан материалым наледаш йӧн лиеш.

Йӱла почеш арня тӱҥалтыште яшлыкыш оксам «Сердце матери» фондын вуйлатышыже эн ончыч пышта. Тудын деч вара моло благотворитель-влакат ушнат. Шийвундо дене полшаш шонышо-шамыч кеч-могай кечыште толын, оксам пыштен коден кертыт. Шӱман кӧгӧным арня мучаште почыт да мыняр теҥге погынымым шотлат.

Кажне кылдышыште – порылык, сеҥымашым лишемдаш полшымаш! Тидыжым ме шкеак шижна. Вет кова-шамыч дене пырля станокышто ик сеткым пидна. Тыгак шке кид дене лентым пунаш полшышна. Ты сомыллан тыште пеш писын туныктат. Адакшым уло кумылын ыштет гын, жапымат от шиж. Тидымак палемдат волонтёр-шамыч. Садлан эрденак толыт да кастене веле мӧҥгышкышт каят.

Ты поро пашашке теат, йолташ-влак, ушнен кертыда. Пашазе кид, шийвундо дене полшымаш, чылажат аклалтеш да кок пачаш порылык дене тендан деке пӧртылеш. Тек тыге лиеш!

Авторын фотожо-влак.