Кокымшо пачашым ыштыманак

Поянсола клуб вуйлатыше Лидия Платунова.

Звенигово районысо Поянсола тӱвыра пӧрт кок пачашан зданийыште верланен. Тыште, чылт марий ялыште, марий-влак рушаҥаш тӱҥалыныт. Шукын марий ватын руш эргыже лийыныт. Йоча-шамыч марла моштат гынат, огыт кутыро, «не умею» манын ойлаш тӧчат. «Тидыжак пашам ышташ мешая», ойла тӱвыра пӧрт вуйлатыше Лидия Платунова.

Л.Платунова шочынжо ты кундемысе Нурӱмбал ял гыч. 1984 ийыште культпросветучилищым тунем пытарымеке, пелашыже, Кужэҥер кундем Визым гыч Валерий Платунов дене Поянсолашке пӧртылыныт. Кеч самырык вате-марийым Килемар районысо Красный Мост посёлкышто, Советский да Кужэҥер велне вученыт. Тушто пачерат ямде лийын. А Лидия шке шочмо верышкыже кайынеже, тыште тӱвырам вияҥдынеже улмаш. Адакшым Поянсола корнымбалне верланен, ял марте асфальт шаралтын, транспорт коштеш. Тыште тунам Виктор Павлович Стрельниковын вуйлатыме «Новый путь» совхоз поян лийын. Директор озанлыкын оксаж дене кок пачашан чапле школым чоҥен, 1989 ийыште клубым почын. Тудак самодеятельный артист-влаклан йолчиемым, тӱрлӧ костюмым, йолчиемым, семӱзгар-влакым налын коден.

Самырык вате-марий пашалан рӱж пижыныт, коллективым погеныт. Эре икымше верлам наледаш тӱҥалыныт. Кажне кугу пайремлан фермыште кажне бригаде концертым ямдылен. Совхоз пашаеҥ-влак дене кугу хорым чумыреныт. Сценыште 70 наре еҥ шоген. А вара перестройко тӱҥалын, вуйлатыше вашталтын, да илышат вашталтын. Платуновмытланат пашам вес вере кычалаш пернен. Ондак Валерий каен (тудо тӱрлӧ вере чоҥымо пашам шуктен да кызытат вахте йӧн дене Москош кудалыштеш), а Лидия, 27 ий клубышто ыштымеке, 2012 ийыште тыгак Москошко охранниклан тарванен. Кум ий гыч тудым уэш клубыш ӱжыныт.

Репетиционный залым шукертак ачалыман.

Кызыт совхоз уке. Тӱвыра пӧртымат пеш ачалыман. Кок пачашан кугу зданийын кокымшо пачашыже чылт пустаҥын. Чын, икмыняр ий ончыч пӧртвуйым уэш леведме, но ятыр ий тошто пӧртвуй гыч вӱд йогымылан кӧра тувраш шӱаш тӱҥалын, иктаж 10 кабинет (йоча-влаклан кушташ воштончыш зал) яра шинчат, чыла вере штукатурко йога, пырдыжыште чия пытен. Пеш уда сӱрет. Вуйлатыше ятыр ий кокымшо пачашым ачалыме шотышто чыла вере коштеш гынат, верже гыч нимо ок тарване. Пашаеҥ-влак изирак ремонтым шке кӱшеш ышташ толашат. Но тидыже шот огылыс. Теве тений изирак полыш лийшаш, фойем ачалынешт.

Кызыт тыште клубыш коштшат шагал. Амалжым Л.Платунова тыгерак умылтара: еҥ-влак Москош, Озаҥыш да моло вере пашаш кудалыштыт. Адакшым Поянсола гыч шукын «Звениговский» совхозышто пашам ыштат. А тушко чот эрденак лектын каят да паша гыч пеш вараш кодын толыт. Нунын клубыш кошташ жапыштат, вийыштат уке. Дискотекышкат самырык-влак огыт тол, аппаратур уда маныт, нунылан эше диджей кӱлеш.

Неле, но пашам ыштыман. Лидия Платунова да художественный вуйлатыше Ирина Лукоянова (Платуновмытын ӱдырышт) калыкым тӱвыралан тӱрлын шӱмаҥдаш тыршат, ятыр мероприятийым ямдылат. Теве шукерте огыл «Марий калыкемлан» отчет концертым эртарышт. Тӱрлӧ тӱс дене сӧрастарыме моткоч мотор сценыште илалшыжат, йоча-шамычат выступатленыт. Вет тыште йоча-шамычын «Молодёжка», «Котятки» ансамбльышт (И.Лукоянова вуйлата), «Рябинушка», «Ласка шӱм» трио-влак, «Сударушка» мурышо ансамбль, «Нурда сем» калык куштымаш коллектив да «Весела кова-влак» ансамбль улыт.

??

Тевыс тыге. Клуб пашаеҥ-влак шке гына нимом ыштен огыт керт. Вашла полшен, умылен веле пашам ышташ лиеш. Ушныза теат шке ялысе тӱвыра илышыш. Тунам илышна веселарак лиеш.

Ирина Степанова.