2012 ийыште Морко район Коркатово лицей пелен «Морко шӱшпык» волонтёр отрядым чумырымо. Тудым тачысе кече марте лицейыште обществознанийым туныктышо Валентина Николаевна Васильева вуйлата. Шукерте огыл «Морко шӱшпык» отряд «Добро не уходит на каникулы!» Российысе конкурсышто сеҥен.
2017 ийыште лицейыште кадет классым почмо дене отряд военно-патриотический пашам кумданрак шукташ тӱҥалын. Тушко 9-ше гыч 11-ше классла марте ӱдыр-рвезе-влак коштыт. Сеҥымашыштат ятыр. Марий Эл Вуйлатышын грантшым ныл гана налыныт. А Российысе тыгай конкурсышто ынде кокымшо гана ончыл верыш лектыт. 2021 ийыште проектышт дене икымше гана ойыртемалтыныт. Тудын почеш слётым эртареныт. Тенийысе проект пашашт кызытсе илышлан келыштаралтын: СВО теме дене кылдалтын. Проектым илышыш шыҥдараш 300 тӱжем теҥге грант оксам ойыреныт.
– Кызыт шукын СВО-што лийше-влаклан кумылын полшат. Военно-патриотический отряд семын меат тиде йодышым ӧрдыжеш коден кертын огынал. Проект почеш тиде пашаш ме Морко районысо чыла школым ушаш шонена. Тыге йоча-шамыч туныктышышт дене пырля Морко район гыч СВО-што вуйым пыштыше салтак-влакын ача-аваштлан, йочаштлан, пелашыштлан кеҥеж мучко полышым пуэн шогаш тӱҥалыт. Тиде жапыштак герой-влакын фотографийыштым, илыш корныштым шергал лектыт да кажне герой нерген сентябрь марте шымлыме пашам возышаш улыт. Сентябрьыште лицейыштына шымлыме паша дене конференций лиеш. Тушто кажне школ гыч йоча шке геройжо нерген каласкала.
Проект почеш ойырымо окса дене тыгак трапеций сынан 15 ӱстембалым налаш шонена. Тидыже икте-весе дене ваш шинчын кутыраш йӧнан, – мане В.Н.Васильева.
9 майыште «Морко шӱшпык» отряд Морко посёлкышко миен коштын. Тушто йоча-шамыч тистым нумал ошкылыныт, отряд колонным вӱденыт.