Республикын образований да науко министрже Л.Ревуцкая оперативный совещанийыште каласкален:
– У тунемме ийлан кок у школым (Медведево ден Марий Турек районлаште) «Современная школа» региональный проект почеш чоҥен пытарыме. Тыгак «Модернизация школьных систем образования» федеральный программе дене келшышын, куд школым капитально олмыктымо. Тидлан 378 млн теҥге ойыралтын. Тылеч посна 11 районысо 24 тунемме верыште леведышым тӧрлымӧ.
Чылаже тунемме верлам шотыш кондаш 679 млн утла теҥге пуалтын. Теве пожар лӱдыкшыдымылык шотышто пашалан гына 21 млн утла теҥге кучылталтын.
Яллаште 132 школын автотранспортшо уло. Йоча-влакым 229 автобус 362 маршрут дене шупшыкта.
Республикысе школлаште 448 икымше классым чумырымо, тушто 9439 икшыве тунемеш. Кок смене дене 32 школышто шинчымашым погат.
У тунемме ийыште 52 самырык специалистым пашаш налме. «Земский учитель» федеральный программе дене конкурсышто сеҥыше кандаш паша договорым ыштыме.
Кызыт республикыште ДНР, ЛНР да Украина гыч илаш толшо ешлаште ийготыш шудымо 35 йоча ила. Нунылан йочасадлаште, школлаште, училище ден вузлаште верым ойырымо.