Марий Турек район Арбор кундемын ӱдыржӧ Виктория Мамаева Шернур районысо тӱвыра да каныме рӱдерыште художественный вуйлатышылан кандаш ий пашам ышта. Шернур посёлкышто ила, кок эргым ончен кушта. Тӱвыра пашам чолган шуктен, тудо кажне гана у сеҥымашке шуэш.
Йоча годсек уста
Марий Турек районышто Арбор кундем шым ялым иктеш уша. Иктыштыже Чоманэҥер ялыште Викториян йоча жапше эртен. Тудо мураш-кушташ йӧратен, семӱзгарлан шӱман кушкын. Пошкудо Карлыган школ пеленысе музыкальный школышко коштын, домр дене шокташ тӱҥалын. Варажым мастарлыкшым Йошкар-Оласе Палантай лӱмеш тӱвыра да сымыктыш колледжыште вияҥден толын. Тыште тудо «Калык семӱзгар» пӧлкаште тунемын. Тачат ты йӧратыме семӱзгаржым жапын-жапын кидыш налеш.
– Ача-авам усталык шӱлышан улыт. Авам мыйын семынак изиж годым музыкальный школышто домр дене шоктен, но варажым тудым кудалтен. Ачам – тале гармоньчо. Шольым музыкальный школышто балалайке дене шоктен.
Карлыган школышто марий ансамбль ыле. Тудым марий йылмым туныктышо Любовь Игнатьевна Петрова чумырен. Тушко ме, икшыве-влак, мураш-кушташ коштынна, школысо концертыште чӱчкыдын мастарлыкнам ончыктенна, – мане В.Мамаева.
Тӱрлӧ пашаште…
Дипломым налмеке, Виктория тӱвыра пашаште вигак тыршаш тӱҥалын огыл. Тудо ик жап кевытыште ужален. 2009 ийыште паша корно тудым Кужэҥер кундемыш конден, а варажым – Шернур велыш.
– Кужэҥер СДК-ште тӱрлӧ методистлан тыршенам. Тыштак мый Шернур район Горняк посёлко гыч рвезым, ончыкылык пелашым, вашлийынам. Алексей дене 2014 ийыште ушненна да пелашемын шочмо суртыштыжо илаш кусненна. Шернур посёлкысо тӱвыра да каныме рӱдерыште пашам ышташ тӱҥальым. Ял гыч кудалышташ тора ыле, сандене мыланна служебный пачерым ойырышт, – ойлыш Виктория.
Куан ден ойго эре пырля коштыт, маныт. Самырык ешлан куанен илаш гына ыле…Но 2016 ийыште лийше кугу ойго самырык ӱдырамашын илышыжым вашталтен. Тудо жапыште пелашыже нелын черланен да ӱмыр лугыч лийын. Тунам самырык ӱдырамаш кокымшо эргым вучен: 7 тылзаш мӱшкыран кодын. А Витя эргыже тунам 11 ияш лийын.
Мура, кушта, сценарийым воза
Шернур тӱвыра да каныме рӱдерыште Виктория Мамаева эн ончыч методистлан ыштен. 2015 ийыште тудым художественный вуйлатышылан шогалтеныт. Тӱвыра пӧртыштӧ шуко ансамбль уло. Тушко икшыве, кугыеҥ, илалше-влак коштыт. Виктория Анатольевна «Пӧлек» калык фольклор ансамбльыште, «Мелодия» коллективыште мастарлыкшым ончыкта. Тӱрлӧ конкурсышто шкенжым чӱчкыдын терга.
Умбакыже 30 сентябрьыште лекше у номерыште лудса.