2-7 апрельыште Орёл олаште всестилевой каратэ дене Российын первенствыже да фестивальже эртаралтеш. Тушто элнан 56 кундемже гыч 1000 утла еҥ шке вийжым терга.
Марий Элысе спортсмен-влак 16-17 ияш-влак коклаште да «Полный контакт» манме дисциплиныште таҥасеныт. Тушто кум спортсмен сай результатым ончыктен. Михаил Попов (тренерже – Сергей Заньков) 75 кг марте нелытан категорийыште шӧртньӧ медальым сулен, Матвей Борисов – 70 кг марте нелытан категорийыште. А 65 кг марте нелытан-влак коклаште Данил Фёдоров ший медальым налын. Пытартыш кок рвезе тренер Артём Гиносян дене заниматла. Ынде нине сеҥыше-шамыч тений сентябрьыште лийшаш Российысе тунемше-влакын спартакиадышкышт каят.
Фотом Марий Элысе Минспортуризмын сайтше гыч налме.