29 октябрьыште Республикысе изосымыктыш тоштерыште «Музею 40» ончер почылтын. Тушко автор-влакын XX курымын кокымшо пелыштыже – XXI курым тӱҥалтыште сӱретлыме пашаштым чумырымо. Экспозиций Российысе изосымыктыш тӱняште Совет Ушем жапысе реализм гыч тӱҥалын фигуративный сымыктыш марте эртыме корным ончыкта. Кажне экспонат автор дене веле огыл, саман дене палдара. Ончерыште Д.Налбандянын, Н.Ромадинын, А.Кулиничын, В.Сидоровын, М.Суздальцевын, Ю.Кугачын да моло авторын пашаштым ужаш лиеш.
Ты кечынак изосымыктыш тоштерыште эше ик ончер – «Край Марийский» – почылтын. Тудым Россий художниквлак ушемын Марий Элысе пӧлкаже эртара. Тенийысе ончер ты пӧлкалан 60 ий теммылан пӧлеклалтеш. Экспозицийыш кызытсе саман дене кылдалтше паша-влакым, тыгак верысе историй, калык сымыктыш да моло пашам чумырымо. Самырык художник-влакын пашаштымат ужаш лиеш.