«Защитники Отечества» фондын Марий Элысе пӧлкажын пашам ышташ тӱҥалмыжлан 1 июньышто кок ий темын. Ты жапыште тушко 8,3 тӱжем наре еҥ 30 тӱжем утла йодыш шотышто полышым йодын толын. Утларакшым – социальный, правовой, да медицине могырым йодышла дене.
Шочмо элым аралыше-шамычлан полшаш – тиде кӱлешан миссий да кугу ответственность, палдара «Защитники Отечества» фондын марий филиалжым вуйлатыше, Патырлык орденын кавалерже Р.Магсумов.
– Фондын филиаллаштыже кажне геройлан социальный координаторым пеҥгыдемдат, тургыжландарыше йодыш шотышто полыш посна пуалтеш. Тидыже салтакын йодышыжым жапыштыже рашемдаш полша. Вет СВО гыч пӧртылшӧ ветеранлан тыглай илыш дек тунем шуаш, тудлан шке верым муаш жап кӱлеш. А тидлан медицине, юридический йодыш-влакым рашемдыман, реабилитацийым эртыман, социальный полышым налман, тыгодымак шкем тӱрлӧ могырым шуарыман да спорт дене кылым кучыман. Чыла нине йодыш-влакым «Защитники Отечества» фонд решатлаш полша, ме ветеран да нунын ешышт пелен эре улына. Кугу командынан еҥже-влак кажне кечын тыршат, спецоперацийын ветеранже-шамычлан полышым пуымо системе эре саемеш, – манеш РФ обороно министрын алмаштышыже, «Защитники Отечества» фондын председательже А.Цивилева.
Марий Элысе филиалын социальный координаторжо-влак командыште 30 наре еҥ тырша. Е.Дубникова тушто икымше кече гычак пашам ышта.
– Мемнан полшымо дене ветеран-влак да нунын ешышт шижыт: нуно шкет огытыл, иктаж йодыш шотышто мыланна эре эҥертен кертыт, – палдара Елена Сергеевна.
Патырлык орденын кавалерже А.Смирновын передовой гыч пӧртылмекыже, фонд тудлан кугун полшен: умбакыже тунемаш, санаторийыште вийым погаш, самырык-влакым патриотизм шӱлышеш куштымо пашаш ушнаш да спорт дене кылым кучаш кумылаҥден.
«Защитники Отечества» фондын Марий Элысе филиалжын архивше гыч налме фото.