Ольга шуко икшыван ешыште шочын-кушкын. Кугурак икшывылан суртышто паша ятыр логалын.
Ӱдырын кидше чыла сомыллан келшен, яра жапыште кидпашамат ыштен шуктен. Ольга ялыште шуко еҥлан марий тувырым тӱрлен пуэн.
Коло кок ияш улмыж годым пошкудо села гыч Зина дене палыме лийын. Тиде ӱдырамаш Гриша эргыжлан тувырым тӱрлен пуаш йодын. Тыге Зина Ольгамытын суртышкышт икмыняр гана толын коштын. А вара Ольгам шкеж деке унала ӱжын. Ӱдырлан палыдыме суртыш мияш йӧндымын чучын, но тувырым наҥгайыме амал дене каяшыже логалын.
Тунам Ольга Гриша дене палыме лийын. Зина ӱстембак шуко кочкышым поген, самырык ӱдырым кол когыльо дене сийлен. ТудыжоОльгалан моткоч тамлын чучын.
Гриша шке илышыж нерген каласкален. Рвезе Ольга деч шым ийлан кугурак лийын. Ӱдырым налын, но ватыж дене пырля кужу жап илен огытыл. Пелашыже йочам ыштен кертын огыл улмаш.
Кастене Гриша Ольгам мӧҥгыж марте ужатен каен. Ӱдырлан каче пешыжак келшен огыл. Но ты кас деч вара Гриша Ольга деке кажне кастене толаш тӱҥалын. Кажне гана аважын кӱэштме когыльыжым конден. Икана – олма дене, вес гана – полан дене…
Тыге кум тылзе эртен. Ольга Гриша деке тунемын шуын. Кажне толмыж деч вара йӧратымашыже пуйто чотрак вияҥын.
Трукышто Ольга чот черланен. Тудым эмлымверыш наҥгаеныт, тӱрлӧ анализым ыштеныт, но нимогай черымат муын огытыл. Ик арня эмлымверыште кийыме деч вара Ольга черкыш ошкылын, сортам чӱктен, шуко жап кумалын. Ты татыште тудын воктеке шоҥго ковай толын шогалын да каласен:
– Когыльым тетла ит коч. Тыйым сымыстараш тӧчат. Кажне эрдене юмынвӱд дене чуриетым муш да молитвам луд.
Вара верже гыч тарванен да черке гыч писын лектын каен. Трукышто Ольга кӱэмалтше гай лийын.
Тылеч вара Ольга Гриша дене вашлиймым чарнен. А ик ий гыч вес кундемыш пашам ышташ каен да туштак марлан лектын, илаш кодын.
Юра.
У Торъял посёлко.