Марий Турек кыдалаш школышто 9 классым «4» да «5» отметкылан тунем пытарен, Анюта Ендылетова кодшо ийын Йошкар-Оласе технологический техникумын студенткыже лийын. Тудо «Банковское дело» специальностьым ойырен налын. Pачёткыштыжо ик «нылытан» отметке гына, молыжо «визытан».
Анюта ондакат шуко палаш тыршыше лийын: биологий, математике, руш йылме дене школ олимпиадыште шке моштымашыжым терген; тӱрлӧ конкурсышко ушнен, черчений дене ешартыш кружокыш коштын. А рӱдолаште тудо тунемше-влаклан шке полыш кидшым шуялтен, репетитор семынат полшаш тӱҥалын.
– Икымше курсышто тунемме жап мылам моткоч шкешотан ыле, вет вес верыште иленам да шинчымашым погенам. А тунемаш нелын чучын огыл. Банк пашаеҥлан экономикым палыман, еҥ-влак дене пашам ыштыман, документыште шотым муман да ончыко каяш пеҥгыде койыш-шоктышан, чытышан лийман, – мане Анна.
Марий ӱдыр аважын кресаважын урген пуымо тувыржо дене марий пайремлашке лекташ ок вожыл. Тений Китне ялыште эртарыме Агавайремыш тудын ешыже да родо-тукымжо чылан марла чиеныт ыле. Утларакше Аня мураш кумылаҥын. Марий Турек сымыктыш школым хоровой мурымаш дене тунем лектын.
Анюталан пазлым, алмазный мозаикым погаш келша. Тыгак маникюрым ышташ тунемеш. Яра жапыште фильмым да сериалым ончаш, Йошкар-Олам шымлен кошташ, тудын чыла сӧрал вержым ужаш тырша. Кинотеатр ден театрлашкат уло кумылын миен толеш.
А эн чотшо Аня фентези ден детективым лудаш йӧрата. Пытартыш жапыште Маргарет Роджерсонын «Магия шипов», Агата Кристин «Труп в библиотеке» произведенийыштым лудын. Джоан Роулингын «Гарри Поттер» романын серийже-влакым коллекций семын поген шогалтен. Тышеч эн йӧратымыжлан «Гарри Поттер и тайная комната» романжым шотла.
«Мылам ӱдыремын книгам лудмыжо келша. Вара тудым йолташ ӱдыржӧ дене пырля каҥашат. Тидыже шонкалаш, илышым умылаш утларак полша, шонем», – манеш йочасадыште воспитательлан ыштыше аваже.
– Кажне кечынак ом луд, яра жап да кумылем лектеш гын, книгамак кучен шинчам. Тунамже кокла шот дене кечеш 40 страницым куанен лудам, – ойла Анюта.
Самырык-шамыч книгам лудаш ӧрканат, маныт. Коклаште Аня гай молодец ӱдыр-рвезе-влакым вашлият да куанет!
Э.Терентьева.
Еш альбом гыч налме фото.