Йошкар-Олаште 50 наре книгагудо уло, кажныжын – шке ойыртемже. Светлана Багаева Марий кугыжаныш университетыште Р.А.Панова лӱмеш шанче книгагудышто калыкле ден краеведений литератур пӧлкаште 15 ий тырша.
Книга деке шӱмаҥденыт
Светлана Геннадьевна Морко район Волаксола ялыште туныктышо ешеш шочын-кушкын. Ачаже школышто математике ден физикым туныктен, аваже вожатый ятыр жап лийын, вара интернатыште воспитательлан пашам ыштен. Нунак ӱдырыштым книга деке изинек шӱмаҥденыт.
– Ача ден авамын кажныжын шке пашашт дене кылдалтше книга-влак лийыныт. Ковамат, кеч тудын ийготшат кугу ыле, лудаш моткочак йӧратен, клуб пеленысе книгагудо гыч шканем да тудлан ятыр марий книгам налын толынам. Лудаш шӱман ешыште кушмылан кӧра шӱжарем дене когыньнанат книгам йӧратымаш ылыжын, – ойла С.Багаева.
С.Багаева 9-10-шо класслам Зеленогорский школышто тунемын, вара Н.Крупская лӱмеш Марий пединститутышто тӱҥалтыш класслам туныктышо специальностьым налын. Институт деч вара Кожлаял школышто 1-4-ше класслам вич ий туныктен. Вара ешыж дене Йошкар-Олаш илаш кусненыт. С.Багаева оласе книгагудын ик филиалыштыже библиотекарьлан ышташ тӱҥалын. Тыгак республикысе йоча книгагудышто кандаш ий тыршен.
Оҥай паша
Светлана Геннадьевнам Н.К.Крупская лӱмеш Марий пединститутын шанче книгагудышкыжо ӱжыныт. А 2008 ийыште пединститутын да Марий кугыжаныш университетын шанче книгагудышт ушалтыныт, тудо Р.А.Панован (МарГУ-со библиотекын икымше директоржо) лӱмжым нумалаш тӱҥалын.
– Лудшына-влактӱрлӧ улыт. Икмыняр ий ончыч университетыште марий студент-влак шукын тунемыныт гын, кызыт группыш рушла кутырышо ӱдыр-рвезе-шамыч утларак ешаралтыт. Нунылан марий писатель-влакын произведенийыштым кусарыме книга-влак улыт. Студент-шамыч сылнымут, учебно-методический книгалам налыт, а чонлан келшыше книгалан ик-кок еҥ гына коштеш.
Ме кечыгут книгам гына пуэдена манын, шукын шонат дыр, но мемнан вес пашат шуко. Кажне книган шке документше, номерже да шифрже лийшаш улыт, тыгак алфавит, системе да топокаталог-влакым шотыш кондена. Кызытсе илыш дене тӧр каена, сандене электрон каталог ден картотекым вӱдена. Тыгай картотекыже мемнан университетысе студент-влаклан поснак пайдале, вет курсовой да диплом пашам возымышт годым тӱрлӧ уверым электрон каталогышто кычалашышт йӧнанрак. Тыгак у книга лектеш гын, нуным «ВКонтакте» соцкылысе тӱшкаштына видеообзорым, презентацийым ямдылен вераҥдена, – палдара библиотекарь.
Книгагудо пашаеҥ-влак тӱрлӧ мероприятийым, вашлиймашым эртарат.
Ойыртемалтше книга
Калыкле ден краеведений литератур пӧлкаштына 15 тӱжем наре тӱрлӧ шанче книга шотлалтеш. Книга фонд тӱрлӧ семын пойдаралтеш.
– Университетын шке издательствыже уло, марий филологий, литератур дене сборник-влак чӱчкыдын лектыт. Туныктышо-шамыч книгаштым савыктат, вара тудым мыланна кондат. Тыгак писатель-влак тӱрлӧ вашлиймашым эртарат да возымо пашаштым мыланна конден пуат. Южо преподаватель сулен налме канышыш кайымыж деч ончыч шке библиотекыжым мыланна пӧлекла. Ты книга-влакым келшыше пӧлкаш вераҥдена.
Пӧлкаштына ойыртемалтше, чот аклалтше книга-влакат улыт. Мутлан, Сергей Николаевын 1931 ийыште лекше «Тревога» пьесыже, Пет Першутын «Пеледмӓш» почеламут книгаже (1940 ий), Миклай Казаковын «Тул коклаште» почеламут сборникше (1943 ий). Поснак тошто книга-влак мемнан отделыште шуэн вашлиялтше книга-шамыч фондышто аралалтыт, – палемда Светлана Геннадьевна.
«Книгагудышто пашам ыштымылан ода ӧкынӧ?» йодышлан библиотекарь тыге вашештыш:
– Ялыште илем гын, туныктышак лиям ыле, но тыге савырнымылан нимынярат ом ӧкынӧ. Ты пашам мыланем моткоч келша, вет студент, туныктышо-шамыч дене пашам ыштем, коклан журналист, воспитатель-влакат мемнан деке пурен лектыт. Студент-влак книгалан веле огыт, тыгак мутланаш толыт. Ме ик верыште огына шинче, тӱрлӧ книгагудышто эртаралтше мероприятийыш лектын коштына, – ойла С.Багаева.
Яра жапыште Светлана Геннадьевна детектив сынан книгам лудаш йӧрата. Ондак гладь дене тӱрлен, пидын. Кызыт садыште тырша, каныш кечыж годым ача-аваж деке унала миен толеш.
С.Багаевам да моло библиотекарьым пайремышт дене саламлена.