2009 ий гыч тÿҥалын, 14 мартыште уло Россий мучко Православный книган кечыже палемдалтеш. Тиде амал дене Морко поселкышто Юмын Кончымо лÿмеш черкын книгагудыжо, Моркысо йоча-влаклан модельный да рÿдö книгагудо пашаеҥ-влак 14 гыч 21 март йотке Православный книга арням увертареныт да икмыняр оҥай вашлиймашым эртараш палемденыт.
«Духовный книган суаплыкше» лÿман ик вашлиймашыже Моркысо 6-шо номеран школын актовый залыштыже 7-8 классыште тунемше-влак дене эртен. Тиде вашлиймаште книган кÿлешлыкше да тудын айдемым утларак шонаш таратен кертмыжым, койыш-шоктышыжым, кöргö шонымашыжым сай могырыш вашталташ полшымыж нерген ойлымо. Йоча-влакын сцене гоч йоҥгалтарыме почеламут корнылашт тидымак пеҥгыдемден: пеш келге шонымашан, чонышко логалше, шонаш таратыше нуно лийыныт.
Вашлиймашке толшо ÿдыр-эрге-влак Юмын Кончымо лÿмеш черкын настоятельже Леонтий ачан ойлымыжым пеш тÿткын колыштыч. Мутланымаште «мо тугае сай, а можо осал?» йодыш-влаклан вашмутым муыныт, илышыште айдемын верже, шкем кузе кучен моштымо нерген, молан мемнан мландываке толмынам православий могырым умылтарен ойлымо. Эн тӱҥжӧ – Юмын кӱштымаш-влак да нравственный закон дене палдарыме.
Йоча-влак тӱняште поро пашам гына ышташ кӱлмӧ нерген шуко пален налыныт, православный книгаште илышын чынже утларак ончыкталтмым рашемденыт, сандене лудаш кумылыштат утларак лектын манын шкешт палемденыт.
