Нине пеледыш-влакым ужмеке, йодыш лектеш: тиде шке ыштыме але илыше, чынже денак кушшо саска? Но тудо чынже денак кушкеш гын, кушто тудын кушмо верже, кӧ тыгай моторым ончен кушта? Пеледыш-влакын озашт – кидмастар Надежда Данилова. Ме ӱдыр деч саде юзо пеледыш-влак нерген каласкалаш йодна, шкеж дене палыме лийна.
Н.Данилова Морко посёлкышто шочын, 5 ияшыж годым ешыже Советский район Голубой посёлкыш илаш куснен. Тысе тӱҥалтыш, Солнечный посёлкысо школлаште тунемын, 9 класс деч вара Морко район Волаксола школышто юридический направлений дене тунемын. Юрист специальностьым Йошкар-Оласе строительный техникумышто да Марий кугыжаныш университетыште налын. Кызыт Йошкар-Олаште ила.
– Кидпашалан изинек шӱмаҥынам. Школыш коштмем годымак ковам мыйым спице дене пидаш туныктен. Тыгак курчаклан, вара шӱжаремлан тӱрлӧ вургемым ургенам. Ачам мылам эсогыл ургымо машинам пӧлеклен. Кызытат тиде сомыл мылам моткоч келша, кызытат ургем. А пеледыш-влакым икымше эргым дене канаш лекме жапыште ыштылаш тӱҥалынам. Декрет жап моткоч эркын эртымыла чучын, а мый нимом ыштыде шинчен ом мошто. Ончыч гофр кагаз дене лишыл еҥ-влаклан пӧлекым ыштылам ыле, но тыгай кагаз вашке шапалга, моторлыкшым йомдара. Тунам Интернетыште изолон материал дене тӱрлӧ арверым ыштылаш тунемым. Тудо шокшо я вӱдыжгӧ годымат нимо ок лий, – ойлыш Надежда.
Изолон материалым чыла вере огыт ужале. Ты шотышто нелылык лектын. Но чон у кидпашам ыштен ончашак ӱжын. Тиде йодышым рашемдаш адакат Интернет полшен. Тушто мо кӱлешым налмеке, Надя икымше кечынак чатка да тул дене волгалтарыме пеледышым ыштен. Тиде жап нерген шарналтен, кидпазе тыгерак каласыш:
– Игнат эргымлан тулан пеледыш поснак келшен, кажне йӱдым пӧртым волгалташ чӱкта ыле. Тудо кидпаша дене шинчымем годым эре воктенем лийын, полшаш тыршен. А Алексей пелашем пеледышеш тулым «пижыктен» пуэн, электрике шотышто лачак тудо полшен. Вашке ме кокымшо пеледыш аршашым ямдылышна. Кӧршекеш келыштарыме роза аршаш авамлан сай пӧлек лие.
Тыге моло родо-влакат йодаш тӱҥальыч, а мый нунын йодмыштым уло кумылын шуктенам. Поснак карантин годым шуко пеледыш ышталте. Кевыт-влак петырныме дене пӧлекым наледаш йӧн лийын огыл, сандене ятырын изолон гыч пеледышым ыштен пуаш йодыныт.
Даниловмыт ешыште кокымшо икшыве кушкын шуын. Ӱдырын ойлымыж почеш, Мирон эргышт моткоч чулым, чыла палаш тыршыше. Кок йоча дене пашам виктараш нелырак лийын. Изолоным лышташ, пеледыш йылме, бутон семын пӱчкедымеке, кӱлеш формым ышташ манын, чоҥымо годым кучылталтше фен дене 250 да кугурак температур марте ырыктыман. Тидыжым йоча-влак дене пырля ышташ лӱдыкшӧ. Тыге Надежда эше ик кидпашам ышташ тунемын.
– Мый пеледыш-влакым шовын дене ышташ тӱҥальым. Тиде паша куштылгырак да йоча-влаклан тунар лӱдыкшӧ огыл. 8 март шуэш ыле, сандене ик мотор аршаш почеш весе «шочыныт». Шовыным сай качестваным веле налам (аллергий ок лий), кочкышым ямдылымаште кучылтмо чиям гына кучылтам, – ойла Н.Данилова.
Кызыт Надеждалан кидпаша – декретыште шинчыме жапым сӧрастарыме, чоным кандарыме, лишыл еҥ-влакым куандараш полшышо ик эн сай йӧн. А жап йогыным садак от кучо, тӱҥжӧ – тудым пайдалын эртараш. Ты шотышто Надежда тыге ойла:
– Палымем-влак йодыт, кушто мый жапым муам. Но иктаж-мом чотак ыштыме шуэш гын, жапат лектеш. Сандене ӧрын ида шого, кумылда уло гын, пашалан пижса веле. Шӱлыклан вуйым ида пу. Кеч-могай неле ситуаций ончыко веле каяш кумылаҥдышаш. Мутат уке, илышыште эн тӱҥжӧ – тиде еш, тудым саклыаман, аралыман, но чон йодмо пашам шуктыде ида кодо. Тыге веле шкежат, лишыл еҥда-влакат пиалан лийыт.
Фото-влакым Н.Данилован
архивше гыч налме.
