Кызыт ятыр самырык еҥ каникулым пайдалын эртараш тырша. Тыге вий-куатым пога да у тунемме идалыклан ямдылалтеш. Теве У Торъял районысо Тушнур фермыште тыршыше самырык еҥ-влак дене июль тӱҥалтыште ты озанлыкыште лиймем годым палыме лийынам ыле. Тунамак мотор ӱдыр-шамычын паша деч лӱддымӧ улмыштым палемденам.
Фермыш кудалме годым асфальт корно дене йолын ошкылшо сылне ӱдырым машинашкына шындышна. Туштак тудын дене тӱрлӧ нерген мутланаш тӱҥална.
Эвелина Речкина Тушнур ял гыч. Кокымшо сменыш пашаш вашкымыж нерген ойлыш. Ӱдыр – Марий кугыжаныш университетын студенткыже. Кумшо курсыш вончен. Ончыкылык туныктышо лияш ямдылалтеш.
– Кызыт ятыр самырык еҥ каникул годым пашам ышта. Мыйынат шуко йолташем тыге тырша. Ӱмаште, мутлан, У Торъял посёлкысо ик кочмыверыште пашам ыштенам. Но посёлко гыч ялыш кастене мӧҥгӧ пӧртылаш пешыжак йӧнан огыл, садлан тений верысе озанлыкыш пашам йодын, шкеак миенам, – ойла Эвелина.
Ӱдыр Тушнур фермыште вольыкым ончышын сомылжым жаплан шукта. Тудын Виктория шӱжаржат тыштак тырша. Тудо 9-ше классым тунем пытарен. Акаж дене смене дене пашам ыштат. Иктыже эр гыч кечывал марте вольыкым онча гын, весыже – кечывал гыч кас марте. Ака ден шӱжар мӧҥгӧ квадроцикл дене кудалыштыт. Тыгай технике дене ялысе корнылаште поснак йӧнан, маныт.
– Вольыкым ончаш мыланем нимынярат неле огыл. Вет кызытсе илышыште технике кугу верым айла. Кнопкым веле темдышт моштыман. Адакшым шкан кучылташ ситыше оксам ыштен налмат кумылым нӧлта. Тыге ача ден аванан тунемме идалыклан кучылтмо роскотыштым иземдаш полшена. Вургемым, канцеляр сатум, тӱрлӧ арверым шкеак наледена, – каласкала Речкина.
Ӱдыр-шамыч, чынжымак, паша деч лӱддымӧ улыт. Вет нунын ешыштыштат ятыр вольыкым ашнат, шуко пакчагӧргым шындат. Садлан Эвелина ден Виктория изинек тидлан тунем кушкыныт.
Иван Речкинын фотожо-влак.