5-9 майыште «Мари ушем» мер организацийым вуйлатыше Василий Петров СВО кайыме верыш 22-шо гана миен толын, а гуманитарный грузшо 67 утла тонныш погына. Кум автотранспортым наҥгаеныт.
Ты гана тудын дене пырля ушемын кок чолга еҥже – Волжский район Пӧртанур гыч Константин Орлов ден Виче кундемын ӱдыржӧ Елена Шабрукова – миеныт. Нунылан Марий тӱвыра рӱдер машинам ойырен, а Марий книга издательстве книга ден газет-влакым пуэн колтен. Чумыржо 3 тонн наре гуманитарный грузым наҥгаеныт. Ты гана танкист-шамычлан ятыр кочкышым (пареҥгым, ковыштам, шоганым, кешырым, тушонкым…), маскироватлыме сетке ден дроным кучаш вапш, салтак душ-влакым, кок бензогенераторым, Урал машинала оравам, техникылан ятыр шапаш ужашым да молымат погымо. Нуным Курск областьысе Суджа ден Рыльск кундемлашке наҥгаеныт.
Каласыман: Елена ик жап Ростов кундемыште илен да СВО кайыме верлашке гуманитарный грузым эре коштыктен. Тушто кугурак эргыже вуйым пыштен. Эн ончыч тудым кычалын, а вара салтак-шамычлан полшаш тӱҥалын. Кызыт Йошкар-Олаште ила да ты сомылым кӱлынак шукта.
В.ПЕТРОВ СВО кайыме кундемыште лиймыж нерген да салтак-влакын историйыштым шуко каласкалыш. Кодшо гана апрельыште кок кугу машина дене миеныт. Тыгодым Калык фронтын Марий Элысе пӧлкаже, Шернур район администраций полшеныт.
Чыланат марий-влак лийыныт. Нунын коклаште Шернур районысо рвезын ачаже миен. Тиде СВО салтак – ныл шочшан ача. Но эргыже ачаж деке лектын кертын огыл. Сандене нунылан Донецкыште малаш верештын. Ты кастене Василий деке аваже йыҥгыртен. Палыдымылан каласена: тушто роуминг, ик минутлан 1000 теҥгем кӱрыт. Но аваж дене кутырыде кертын огыл. Аваже Донецкыште улмыжым пален налын, шӱжаржылан ойлен. А тудын пелашыже лачак Донецк направленийыште служитлен. Тыге Василий деке 10 ий уждымо родыжо (танк бригадын подполковникше) вучыдымын вашлияш толын. Кузе тыгайлан от куане?!
Марий Эл гыч мийыше-влак деке мутланаш да гуманитарный грузым налаш Йошкар-Ола, Пенза, Уфа олаласе да Марий Турек район Арбор, Советский район Ургаш, Кужэҥер вел гыч марий рвезе-шамычат лектыныт. Чыла тидыжым мийыше-шамыч чонеш логалше тат семын палемдыш, вет палыдыме еҥ-шамыч кугу уна семын вашлийыт. Йодмаш почеш намийыме кугу груз деч посна мӱйым, марий шевроным кучыктеныт.
– Кажне подразделенийыште марий-влак улыт. Командир-влак дене кутырет, марий салтак-шамыч нерген чытыше, мутым шуктышо да мастар кид-йолан улмышт нерген ойлат. Посна верлаште марий-влакын тушман ваштареш чот шогымыштым пеҥгыдемдышт, – каласкала Василий. – Шочмо Звенигово район Эсмекпляк кундем гычат рвезе-шамыч дене кылым кучем. Кодшо кечылаште отпускыш толшо веҥе марийнам СВО-шко ужатышна. Кум изак-шоляк гыч эн изиракше тушто шке порысшым шуктен, сандене кугуракшын чонжо ыш чыте, «Вет изиракна бойышто, а ме мӧҥгыштӧ – тыге лийшаш огыл» манынак каен. Тыгак рвезе-шамыч икте-весе почеш спецоперацийыш корным кучат: ача ден эргыже, шольо ден изаже. Сандене тушто нимогай ойыркалымаш уке, чылажат иктеш. А нунылан мийыше-влак дене кутырымаш эм гаяк кӱлеш.
Ты гана мийымыж годым В.Петров Курск областьыште флагым погышо, тунемше Сергейлан «Мари ушемын» тистыжым пуэн коден. Рвезе ты жапыште Москосо Парадыш каен (ты йоча Россий Президент В.Путинын ойлымыж годым шеҥгелныже коеш). Ачаж дене кутырымеке, Василий рашемден: ешыштышт шым икшыве: куд ӱдыр да эн изиже, Сергей.
Лишыл жапыште марий активист-влак адакат СВО кайыме верыш полыш дене тарванат. Вет нунын деке йодмаш кажне кечынак пура, а фронтлан полшымаш – пеш суапле паша. Кумылан-влак, «Мари ушемын» счётышкыжо оксам колтен кертыда (5479 1120 3543 3857, Сбербанк).
Фотом В.Петровын архивше гыч налме.
