Волжский район Сотнур селаште илыше Радик Петров пу дене тӱрлӧ ӱзгарым ыштылеш.
Шке сурт-оралтыжымат пеш моторын сӧрастарен. Пашам ышташ йӧнан лийже манын, кудывечыштыжак посна мастерскойым чоҥен шынден. Леведыш йымалне тӱрлӧ станок-влак улыт. Нунын кокла гыч иктыже гына налме, молыжым Радик Логинович шке кидше дене поген. Чыла арверын, кажне шуруп ден гайкын шке верышт улыт. Мастерскойым шокшо коҥга ырыкта. Тудым чиялтыме ӱзгар-
влакым вашкерак кошташ манын ыштыме. Телым кӧргыштӧ кид дене чиялтат, кеҥежым компрессор дене. Мастерскойыш пурен шогалмеке, чия пушым шижна —окна рамым чиялтат ыле.Кидмастар тӱҥ шотышто омсам, окнам ышта. Тыгак мончаште арверым шындылме полкым, под леведышым, шкатулкым, наличникым йодын толыт. Шукерте огыл Приволжский посёлкышто вич пачашан пӧртыштӧ подъезд окнам вашталтен.
– Икымше гыч индешымше класслаште эре хозяйственник лийынам. Школ деч вара путёвко дене ик тылзылан Шем теҥыз воктеке канаш миенна. Тушто мый фонтаныш ший оксам кудалтенам да армий деч вара шкенан колхозыш столярлан пашаш пураш шоненам. Тӱвыра да сымыктыш колледжыште тунеммем годым кумшо курс гыч армийыш каенам. Армий деч вара Славик Асмаев уэш тунемаш пураш ӱжын, но кумыл лийын огыл. Пел ий гыч колхозын столярныйышкыже пашаш нальыч, – ойлыш Р.Петров.
Радик Логинович Надежда пелашыж дене кок шочшым – Станислав ден Марианнам – ончен куштат. Стас – 16 ияш. Кеҥежым ачаж дене пырля пашаш коштеш, мӧҥгыштат полшен шога. Изиж годсекак шкаланже да йолташыже-влаклан пу пистолетым ыштылын. Рвезе спорт дене
пеҥгыде кылым куча, ончыкшым военный направлений дене тунемаш кайынеже. Школыштат шке мастарлыкшым ончыкта, литератур конкурслаште ятыр гана почеламутым лудын, сеҥышыш лектын. Марианна 4-ше классыште тунемеш, мураш-кушташ йӧрата, ансамбль дене концерт денат шуко верыш миен коштыныт. Уста шӱлышан ешыште чыланат талантан улыт. Тек умбакыжат пашашт тӱвыргӧ лектышан лиеш!