Специальный военный операцийын Марий Элысе ветеранже-шамыч Элым аралыше-влакын кубокышт верч таҥасымашын округысо этапышкыже каеныт.
13 еҥ кундемнан чапшым арала
Таҥасымаш Угарман кундемысе Дзержинск олаште лиеш. Тушто регионысо паралимпиец-влакын «Сильные духом» сборный командыжын 13 еҥже кундемнан чапшым аралаш тӱҥалеш.
Ветеран-влак пуля да пикш дене лӱйкалымаште, ӱстембал теннисыште, кӱзым кышкымаште, пауэрлифтингыште вийыштым тергат. Тылеч ончыч нуно тыгай таҥасымашын кундемысе йыжыҥыштыже ӱчашеныт. Мер илыш дене кылдалтше проект-влакым вуйлатышын алмаштышыже П.Марышевын палемдымыж почеш, паралимпиец-шамыч виян да тале, сеҥымашке шуаш тыршыше улмыштым ончыктеныт.
Тренировко-шамычым эртараш Марий кугыжаныш университетысе физкультур факультет, Российысе ветеран-влакын «Боевое братство» мер организаций да Российысе ДОСААФ-ын регионысо пӧлкаже чот полшеныт.
Командын капитанже
Паралимпиец-влакын «Сильные духом» командыштыже СВО гыч пӧртылшӧ инвалидностян салтак-влак командым 2023 ий шыжым чумырымо. «Защитники Отечества» фондын Марий Элысе пӧлкажын ВК-се лаштыкыштыже герой-шамычын историйышт дене палдарат. Кажне салтакын – шке эртыме корныжо.
Нунын коклаште – ветеран Александр Кармаенков. Элыштына мобилизацийым увертарымеке, Александр моло патриот-влак семынак повестке толмым вучен. Но вучен шуктен огыл. Садлан шке кумылын фронтыш каен.
Тушто тудо медвзводышто служитлен. Сусыргышо салтак-шамычым эвакуироватлыме сборышто водитель лийын. Луганск Калык Республикыште тушманын керылтмыж годым сусыргышо-шамычым луктедымылан «За спасение погибавших» кугыжаныш наградым сулен. Землякнан наградыже-шамыч коклаште Суворовын медальжат уло. Тидыже ветеранын командованийын шындыме задачыжым сайын да ответственно шуктымыжым пеҥгыдемда.
Салтак-влакым утараш черетан заданийыш тарваныме годым FP-дрон-влакын атакышкышт логалын, нелын сусырген. Но тидыжым Александр эн нелылан ок шотло. Ойлымыж почеш, йӱд пычкемышыште тул деч посна машинам виктараш эшеат йӧсырак лийын.
«Защитники Отечества» фондын Марий Элысе филиалжын еҥже-влак ветераным паралимпийский толкыныш ушнаш кумылаҥденыт. Кармаенков –следж-хоккей дене республикысе сборный командын капитанже. Кызыт Элым аралыше-влакын Кубокышт верч таҥасымашлан моло спортсмен-шамыч дене пырля кыртмен ямдылалтеш. Капитан пикш дене лӱйкалымаште да ӱстембал теннис дене модмаште мастарлыкшым ончыкташ тӱҥалеш.
Александрын историйже моло ветеран-влак семынак пеҥгыдемдаш полша: айдемын кӧргӧ вий-куатше кеч-могай нелылыкым сеҥен кертеш.
«Защитники Отечества» фондын Марий Элысе филиалжын ВК-се тӱшкаж гыч налме фото-влак.