– Авай, ужат? Каваште шӱдыр чолгыжеш, ачай мемнам ужын йывырта, йыштак кӱшыч эскера, – тыгай йодышым ныл ияш Полина кажне кечын аважлан пуа. Шагат наре Полинан аваж дене мутланымем годым изи ӱдырын кавашке чӱчкыдын ончымыжым шекланышым. Тыгодым тудо, чынжымак, эреак шӱдыр-влакым кычалеш. Теве-теве шӱдырын нунын деке волымыжым да шыман ӧндалмыжым вуча…
Тыгай сӱретым ужын, тӱня пуйто кумыкталтеш, логарыш комыля толеш, шинча йыр вӱд налеш, чон коржеш… Полинан идалыкым эрталтыше Диана шӱжарже уло. Кок икшыве ача деч посна кодын.
Шучко кече
Йошкар-Олаште илыше Крыловмыт ешыштат СВО кугу «тамгам» коден. Сергей Крылов кундемнан ик военный частьыштыже служитлен. Приказ почеш тений 1 майыште кумшӱдӧ наре еҥым тушеч спецопераций кайыме кундемыш колтеныт. Нунын коклаште младший сержант Сергей Крылов лийын. 11 июньышто Сергейын СВО-што трагически колымыж нерген увер толын.
Ты кечын салтак-влак кечывал деч ончыч заданийыш каеныт, 13 шагатлан тушман миномёт дене атакым тӱҥалын. Сергей, кушеч лӱйкалымым умылаш манын, тушманын точкыжым эскерен. Нуно тудын кушто улмыжым шекланеныт, ӱмбакыже лӱйкаленыт. Кум мине воктечше эртен, а нылымшыже вигак пытарен. Салтакын капше мучко ятыр осколко лийын.
– Пелашем йӧн лийме годым йыҥгырташ тыршен, чыла сай, тургыжланаш амал уке манын ӱшандарен. 11 июньышто 10-11 шагат коклаште тудын деч пытартыш смс-серышым налынам. Тылеч ончыч тудлан ӱдырна-влак дене пырля ыштыме фотом колтенам ыле. Тудо вашештен: «Мыйын шыргыжше ӱдырем-влак. Те мыйын кечем сылнештареда». Серышым налме деч вара пачерыштына тӱрлӧ сомылым тӧрленам. Кӱварым мушмем годым трукышто чонем пуйто ала-могай шижмаш авалтен: мый кок йоча дене шкет кодынам. Юмо аралыже тыгай деч манын, шке семынем пелештенам. Тыге шонымо деч вара икмыняр шагат гыч пачер омсаш йыҥгыртеныт, пелашемын служитлыме частьше гыч военный-влак толыныт. «Пелашда СВО-што шке порысшым шуктымыж годым геройла колен», – маныныт нуно. Нине мут-влак мыланем шӱмыш кӱзым кералме дене иктак лийыныт, – каласкалыш Сергейын Виктория пелашыже.
Йӧратыме пелаш, ача
Морко район Йоплан рвезе Сергей ден Йошкар-Ола гыч Виктория 2015 ийыште ешым чумыреныт. Кок йӧратыше шӱм соцсетьыште палыме лийыныт. 2019 ийыште нунын икымше Полина ӱдырышт шочын. Тудо тӱсшӧ да койышыж дене чылт ачаж гай. Гимнастике дене заниматла. Диана кок ийым февральыште тема. Тудо эше изирак, шукыжым огеш умыло, но кунам военный-влак нунын деке толыныт, аважын шинчавӱдшым ужын, чот шортын.
– Сергей поро кумылан лийын. Мыйым да икшывына-шамычым йӧратен. Наряд але командировко гыч ноен толын гынат, йоча-влакым ончаш, тӱрлӧ сомылым тӧрлаш эреак полшен. Пачерыштына ремонтым шкеак ыштен. Тыгак ялыштат шочмо суртыштыжо кертмыж семын полшаш тыршен. Чот ответственный лийын.
Илен-толын, эрге икшывым ыштена, вара тудым футболыш пуэна манын чӱчкыдын ойлен. Полинамат, кушкын шумекыже, футболыш колташ шонен…
Спортлан шӱман
С.Крылов изинек спорт дене пеҥгыде кылым кучен. Тидланак кӧра шке ялысе школ деч вара Морко посёлкысо 6-шо номеран школыш кадет классыш тунемаш пурен. Вара Марий кугыжаныш университетын спорт факультетыштыже профессионал шинчымашым налын. Футбол дене модаш, ече дене кошташ, куржталаш поснак йӧратен.
Университет деч варат Сергей спортым ӧрдыжеш коден огыл. Ече ӱмбаке чӱчкыдын шогалын, «Российын ечыгорныжо» эстафетыш кертмыж семын ушнен, тыгак тӱрлӧ таҥасымашыште ӱчашен. Тудо «Динамо» футбол командын ик эн тале футболистше лийын. Команде дене тӱрлӧ турнирыште модын.
Ӱшанле йолташ
Сергей дене ме студент годсек палыме улына. Жапым чӱчкыдын пырля эртаренна, ик компанийыште коштынна. Самырык годсо шуко оҥай да мондалтдыме тат-влак ушыш чӱчкыдын пурат. Тудын поро кумылан, весела шинчаончалтышан, эреак шыргыжше, кеч-кунамат полшаш ямде, ласка да тыматле, тунамак кӱлеш шомакым муын моштышо йолташ лиймыжым моткоч аклем. Мый йывыртем да кугешнем, илышыштем тыгай айдеме лийын!
Пытартыш гана апрельыште Сергей дене ужынна. Шоненам мо мый тунам, тудым тетла ом уж манын. Тӱрлӧ нерген мутланенна, йоча-влакын спортышто шуаралтмышт нерген кутыренна. Еш дене вашлияш да шинчылташ шукертак шоненна ыле, тольык я ик амал, я весе тидлан чаракым ыштеныт. А ынде?.. Сергей, йолташ! «Чеверын» манаш йӧршын йылмем ок савырне. Тидым шоналтен, чонлан эшеат йӧсын чучеш…
Патырлык орден дене палемденыт
Младший сержант Сергей Олегович Крыловым 25 июньышто пытартыш корныш ужатыме. Тудын дене чеверласаш Йошкар-Оласе Мер-политике рӱдерыш моткоч шуко еҥ погынен. Тунам кечыжат я чот шыратен ончен, я пыл шеҥгелне шып ойгырен. Салтакым Йошкар-Оласе Туруново шӱгарласе Чап аллейыште тойымо. С.Крыловым, колымекыже, Патырлык орден дене палемдыме. Тудо мемнан шӱмыштына эреак шыргыжше, волгыдо айдеме, герой семын илаш тӱҥалеш!
Еш альбом гыч налме фото-влак.