23 августышто М.Шкетан лӱмеш драме театрын коллективше Морко район Ӱшӱттӱр ялыште «Кавасе алаша» спектакльым веле огыл, а чапле пайремым эртара. Тидын нерген мыланна театрын маркетологшо Йукеч Юзыкайн каласкален.
«Кавасе алаша» постановкышто Кугу Отечественный сар жапысе авиаций нерген шуко пален налаш лиеш. Тиддеч ончыч спектакльым ончаш толшо-влак шке шинчашт дене самолётын чоҥештен кайымыжым ужын, эсогыл самолёт воктене шоген да фотом ыштен кертыт. Вич шагат кастене Йошкар-Оласе авиаций спорт клубын участникше-влак «Кукурузник» самолёт дене аэрошоум ончыктат. Парашютист-влак десантироватлалташ тӱҥалыт. Тидыже йочан веле огыл, кугыеҥынат кумылжым нӧлта.
Шкешотан пайремыште кидпаша выставке лиеш. Тушто верысе да Йошкар-Оласе кидмастар-влак турлӧ технике дене ыштыме пашаштым ончыктат, шуным ненчыме, курчакым ыштыме, тӱрлым пидме шотышто мастер-класс-влакым эртарат.
Ярмиҥга сынан сувениран да тӱрлӧ кочкышан ужалыме радамым, фотозоным йӧнештарат.
А 19 шагат кастене кече шичме годым йӧратыме артистна-влак «Кавасе алаша» спектакльым ончыктат. Билетым кызыт театрын кассыштыже але https://shketan.ru/ сайт гоч 30 %-ан скидке дене налаш лиеш. Мероприятий кечын билет ак шергештеш.
Пайрем чапле салют дене мучашлалтеш. Тыгай изирак фестивальым эртараш полшымаште театрын коллективше Морко администрацийлан, «Акашево» холдинглан, «Фарб-М» охране предприятийлан, «Броксталь» организацийлан, «Плёс» кевыт сетьлан таушта.