«Карлсон семын чоҥештен толынам», – манеш Анастасия Немцова.

Настя визымше гана ава лияш ямдылалтеш. Но тиде йочан шочмыжо поснак ушеш кодеш. Вет азам ышташ тудо вертолёт дене чоҥештен.

Икана Козьмодемьянск олаште эмлымвер воктеке вертолёт волен шинчын. Ондак колынам ыле, тудым экстренный манме ситуаций годым Чебоксар ола гыч ӱжыктат. Тунам «Мыят чоҥештышаш ыле» манын шоналтенам. Тиде жапым шуко вучаш логалын огыл. Верысе эмлымверыш «схватке» дене мийымеке, ик йӱдым тушто эртаренам. Вара мыйым Йошкар-Олаш колташ темленыт. Винт пӧрдаш тӱҥале, кайык семын южыш нӧлталтым. 40 минут гыч республикысе эмлымвер площадкыште лийым. Умбакыже Перинатальный рӱдерыш машина дене конденыт.

Чоҥешташ оҥай, пӱртӱсым кӱшыч ончаш сӧрал, но мӱшкыран годым огыл. А йочам ыштыме пӧртыш толын шумеке, вертолёт дене толмемлан чылан ӧрыныт да мыскарам ыштылыныт, – каласыш Настя.

Вероника Мустаева.