19 декабрьыште Екатеринбургышто «Королева нации» II фестиваль-конкурс эртаралтын.
Тушто Кокла Уралыште илыше, тӱрлӧ калыкын чапшым аралыше 10 ӱдыр таҥасен. Марий-влакын йӱлаштым да ойыртемыштым Екатеринбург олаште илыше Екатерина Соболева почын пуэн.
– Мый марий улам. Марий – Российысе пеш оҥай калык. Ача-авам марий йӱла почеш шке унаштым коҥгаште кӱэштме шаньга ден мӱй дене вашлийыт. Мӱйжӧ ӱстембакына тыглай огыл логалын. Ачам шке тукымжо деч, пӱртӱслан эҥгекым кондыде, мӱйым чын кӱзаш, мӱкшым ончаш тунемын. Кызыт шке шинчымашыжым уныкаже-влаклан пуа. Миша эргым мӱкшотарыште тӱҥ мӱкшызӧ веле огыл, тыгак Екатеринбургысо Суворовский военный училищын 4-ше курсышто тунемше курсантше. Ме тудын дене кугешнена. Изиракше, Владислав, йочасадыш гына коштеш, но кугу мӱкшызӧ лийже манын, тудым ты пашам йӧраташ туныктена. Мемнан марий ешна кумшо тукымышто мӱкшым ончымо пашам шукта да 2028 ийыште 100 ияш лӱмгечыжым палемда, – палдара шкеж дене Екатерина.
Усталык номерыште Е.Соболева марий вургемын моторлыкшо, ший ырший гыч ыштыме яга манме марий аралтыш нерген каласкален. А шкеже вуйышкыжо такиям упшал лектын.
Конкурсыш ушнышо кажне ӱдырлан короным да дипломым пуэныт.
Ты кечынак Екатеринбургышто «Семья – опора России» премийым кучыктеныт. 12 еш коклаште Свердловск областьысе марий-влакын «Урал Мари» НКА-штым вуйлатыше Наталья Ябекован ешыжат лийын.
Е.Соболевам да Ябековмыт ешым марий калыкым чапландарымышт дене саламлена.
Эльвира Терентьева.