Волжский районысо Карай тӱвыра пӧртым Пӧтъял ялын шочшыжо О.Вавиловын вуйлаташ тӱҥалмыж деч вара шагал огыл вашталтыш лийын. Кугу паша кокла гыч фойем, котельныйым олмыктымым шотлыман, кызыт полатыште моло кырча-марчам тӧрлен толыт.
Тӱвыра полат уло гын, усталык паша вияҥшашымат Олег Михайлович сайын пала да икымше кече гычак тидлан пижын манаш лиеш. Кызыт калык театрым уэш чумырымо. 1992 ийыште ышталтше тысе театр шке жапыштыже республикыште илыше-влаклан сайын палыме лийын, самодеятельный артист-влак мастарлыкышт дене ойыртемалтыныт. Но вара тӱрлӧ амаллан кӧра тудо шаланен. Ончылий тысе коллектив, «калык театр» лӱмым уэш нумалаш манын, Йошкар-Олаште шке чапшым арален. Шукерте огыл «Кумушка. Кума» спектакльым шынденыт.
– Олег Михайлович, ты пашаш толмешке, кушто могай сомылым шуктенда?
– Ондак шочмо ялыштем шкемын пилорамем лийын, тушто тыршенам. Чодыра шергештмылан кӧра пилорамым петыраш логале. Ынде кум ий клуб вуйлатыше улам. Ончыч тиде паша неле, мыйынлык огыл манын шоненам. Ышташ тӱҥалмеке, сай да уда могыржымат умылышым. Шарнем: икымше арня кагаз орам лаштыкленак эртен.
– Еҥ-влак деч колна: пашаш толмекыда те пӧръеҥ семын эн ончыч оралтым «утараш» пижында маныт…
– Карай ялысе тӱвыра полат кугу, кок пачашан, совет жапыште чоҥалтын. Тыгай оралтым кучаш шуко окса кӱлеш. Тудо пеҥгыде лийже манын, ачален шогыман. Кызыт эркын чылажымат тӧрлена. Но чыла олмыктенна, ынде полатна чапле манын гына шинчаш ок лий, тушто «илыш шолшаш», калык тышке корным мондышаш огыл. Творческий пашам икмыняр йогын дене виктарен колтенна: театр пашам ышта, «Шийгорно» ансамбльым чумыренна. Участник-влак кугурак ийготан улыт. Мый шкежат тиде ансамбльыш коштам. Репетицийыш арняште кок-кум гана погынаш жапым муына.
–Вургем дене кузерак?
– Ансамбльыш коштшо-влак концертлан вургемым шке окса дене ургыктат. Шуко ялысе ансамбльлаште гармоньчо уке манын ойгырат, мемнан дене гармоньчо веле огыл, тӱмырзынат уло. Веселан илаш тыршена. Кодшо ийын концерт окса дене у гармоньым нална, эртыше телым – кемым.
Концерт дене республикысе чыла районыш лекташ тыршена, пошкудо Татарстан Республикышкат миен шуынна. Автотранспортым районысо тӱвыра пӧлка ойыра. Мемнан декат выступатлаш толыт: Йошкар-Ола, Волжский да моло районла гыч. Ончышо-влакым чумыраш тыршена. Шкетан лӱмеш театрын труппыжо спектакльым конда. Республик кӱкшытан шуко мероприятий Карайыште эртаралтеш.
– Клуб школ воктенак верланен. Йоча-влак ансамбльыш але калык театрыш коштыт?
– Школ дене ме эре вашла полшен пашам ыштена. Но кызытсе йодмаш почеш, йоча-влакым концерт дене вес районлаш коштыкташ нелырак, шуко документым погыман. Такшым тунемше-влак репетицийыш эре коштыт. Отчётный концерт годым полшат: мурат, куштат. Шукыж годым нунылан мурым Надежда Васканова воза.
– Оҥай, кабинетыштыда мотор “трон” шога. Тудым шке ыштенда?
– Уке, тиде – пӧлек. Концерт дене коштмына годым ик предпринимательлан выступатлымына чот келшен. Таушташ шонен, пӧлекым ыштыш. «Те Юлсер кундемыште клуб вуйлатыше-влак коклаште шкетын пӧръеҥ улыда, сандене тыгай пӱкен тыланда утларак келша», – манын. Трон дене пырля ӱстел ден шкафымат пуэн. Тыге аклымылан тауштен, эшеат пашам ышташ кумыл уло – коллектив дене чот тыршена. Эре иктаж-мом да шонен луктына, ыштена. Калыклан гына келшыже.
Ӱшанем: илен-толын, самырык-влакат чолгалыкым ончыктат, мемнан пашаш ушнат.