Курыкмарий ӱдыр, 14 ияш Виктория Романова, кокымшо гана финн-угор йоча лагерьыште участвоватлен.
Козьмодемьянск олаште шочын-кушшо Вика шым ияшак кӱслем шокташ кумылаҥын. Тудо «Дарование» школ-интернат пеленысе «Шика-вика» кӱслезе ансамбльын участницыже. Слётышто Вика кӱслем шоктымо мастарлыкшым ончыктен. «Тыгай вашлиймаш моткоч кӱлешан. Мый шуко йолташым муынам. Поснак удмурт ӱдыр-рвезе-влак дене келшенам. Ӱшанем, кылна нигунам ок йом. Чаманен каласыман, курыкмарий йылмым сайын ом пале. Но калыкнан историйжым, илыш-йӱлажым шымлен, йылмымат тунем шуам шонем», – манеш Вика.