Марина акам ондак пелашыж дене пеш келшен иленыт, но вара илыш шот пужлаш тӱҥалын. Южгунам нимо укештак тума тарванен, эсогыл изиш гына ойырлымашке шуын огытыл. Кажне ешыште тыгайже лиеш, маныда, но акам вашке умылен: ешыштышт умылтарен кертдыме ала-могай томаша ышталтеш, чонланжат каньысырын чучын.
Тунам нуно авалийшыж дене пырля иленыт. Аважат таза, марийжат весела, а акам эркын «кошкен». Кочкешат сайын, но каҥгештеш, вий пытен, эрдене кынелме ок шу, нимом ышташ кумыл уке. Врач деке коштын, нимом муын огытыл, витаминым веле йӱаш темленыт.
Икана ола урем дене ошкылшыжла, ваштарешыже ик чыган ӱдырамаш логалын. Тудо кенета чарнен да каласен: «Ӱдырем, тыйым локтеныт вет». А акам ӱшанен огыл, шке корныж дене писынрак ошкылын. Мо оҥайже, вес олашке кайымекыже, адак чыган кувам вашлийын да тудат тыгак каласен. Тунам акам шонаш тӱҥалын. Тидын нерген авамлан каласен. Тудыжо черкыш миен толаш кӱштен.
Акам черкыш пурен, лачак службо каен. Изишак шоген, кенета нелын чучын колтен, вуйжо пӧрдаш тӱҥалын, изиш вуйушым йомдарен огыл. Пыкше-пыкше уремыш лектын. Тушто тудлан ик ӱдырамаш теҥгылыш шинчаш полшен. Ошемше чуриян акамым ужын, тудлан шнуй вӱдым подылаш пуэн. Акамлан тиде вӱдшӧ чот шокшын чучын, пуйто тӱрвымат когартен, пыкше подыл кертын.
Изиш шинчен да уэш черкыш пурен. Тыге кок-кум гана лектын коштын, кажне гана ӱдырамашын пуымо шнуй вӱдым подылын.
Службо пытымылан куштылгылыкым шижын. Мӧҥгыжӧ кумыл нӧлтшӧ миен пурен. Кажне эрдене шнуй вӱдым подылын да чурийжым шӱалтен. Черкыш коштмым чарнен огыл. Уэш вий пурымым шижын.
А авалийшыжын, мӧҥгешла, тазалыкше лунчырген. Пырляшке лекмымат чарнен, шке пӧлемыштыже утларак шинчен. Эмлымверышкат коштын, но нимогай тугай черым муын огытыл. Маринан пелашыж дене кыл саемын, посна илаш лектыныт. Очыни, тыге сайрак. Акам авалийшыжым ынеж титакле гынат, тудак иктаж осалым ыштен манын шона. Удаже ынде шканже пӧртылын.
Весылан осалым ышташ огеш кӱл. А неле годым кӱшыл вий деч полышым йодман.
ЕЛИЗАВЕТА.
Йошкар-Ола.