Тӱнямбалысе «Союз православных женщин» мер организацийын Марий Элысе пӧлкаже «Сквернословие в современном обществе: свобода слова или этическая распущенность» теме почеш «йыргешке ӱстелым» 2024 ий мучаште эртарен.
Тушко министерстве ден ведомстве пашаеҥ, филолог, туныктышо, психолог, историк-шамыч, духовенствын, мер да молодёжь организацийын, усталык интеллигенцийын еҥышт, калык ончылно мутланаш туныктышо специалист-влак ушненыт. Нуно мутланымаште аватмутым, сай огыл шомак-влакым, кучылтмым чактараш лийме шотышто тӱрлӧ йӧным каҥашеныт. Посна тӱткыш самырык еҥ-шамычын мутланымыштлан ойыралтын. Нунын йылмыштым сылнештараш полшымо шотышто икмыняр темлымаш-влак йоҥгеныт.
Кугыеҥым ончен тунемыт
Тӱрлӧ ийготан еҥ-влак коклаште йылмым куштыраҥдыше сай огыл шомак, аватмут, кызыт чӱчкыдын йоҥга. Ты койыш тӱрлӧ социальный тӱшкалан шелалтше еҥ-шамычым веле огыл авалта. Тыгак литературын, кинон, СМИ-н илышышкыжат кумдан шыҥдаралтеш. Тыге мутланымылан шукын тунемын шуыныт, манаш лиеш. Садлан аватмутым ойлыштмылан шагалынже ӧрыт. Тидыже пуйто шкешотан нормылан шотлалтеш. Улыт тыгай еҥ-шамычат, кудышт аватмутым йылмын ик ужашыжлан шотлат. Садлан айдеме тыгай мут-влак дене пайдаланышашак, маныт. Эсогыл нуно тыге мутланымыштлан кугешнат.
Йоча да подростко-влак коклаштат аватмутым ойлыштмаш чот шарлен. Тидыже поснак кумылым волта. Нуно, кугыеҥ-влакым ончен, тыге мутланаш кумылаҥыт. Тидыже калыкын тӱвыражым кӱшкӧ нӧлташ да уш-акыллан ончыко вияҥаш кугу чаракым ышта.
Икмыняр йӧным кучылтман
Специалист-шамыч тыгай шомакын илышыш шыҥдаралтмыжым тӱрлӧ могырым лончыленыт. Йылме моторлыкым арален кодаш, калыкым кӱлеш-оккӱл шомак деч кораҥдаш икмыняр йӧным темленыт.
Эн ончыч радио-, телевидений-, печать-, интернет ресурс-влак дене пайдаланен, йылмым тӱрлӧ куштыра деч «эрыкташ» келшен толмым палемденыт. Тыгай ресурс-влак полшымо дене аватмутын кушко шуктен кертмыж нерген каласкалыман. Тыгак калык коклаште тудым шаркалымылан закон ончылно мутым кучаш шогалтыме нерген умылтарыман. «Аватмут деч посна» банерым ыштен, районлаште, рӱдолаште вераҥдаш сай лиеш. Школлаште але профессионал шинчымашым пуымо тӧнежлаште информационно-просветительский мероприятийым эртарыман. Тудым элнан эн кугу поянлыкшым – йылмым – арален кодымылан виктарыман. Кугурак класслаште тунемше але студент-влак коклаште анкетированийым организоватлаш келшен толеш. Тыге гына самырык еҥ-шамычын аватмутым ойлыштмыштым умылаш лиеш. Йошкар-Оласе да районласе школлаште «Культура речи» урокым пурташ уто огыл. Урок годым йочан да подросткын уш-акылже сай шинчымаш дене пойдаралтеш. Тыгак калыкын тӱшка верлаште аватмутым кучылтмылан иктаж-могай мерым приниматлыман, тидын шотышто профилактике сынан мероприятий-влакым эртарыман.
Чынжымак, специалист-шамычын темлыме йӧныштлан эҥерташ гын, самырык-влак коклаште аватмутын, кӱлеш-оккӱл шомакын вияҥмыжым «темдалаш» лиеш. Тидыже ӱдыр-рвезе-влаклан кӧргӧ чонышт да ушышт дене кушкаш сайын полша. Тыге йылмыштат ару лиеш.
Фрипик сайт гыч налме фото.