Йошкар-Олаште «Сереброзубая Пампалче» марий йомак тоштерыш толшо-влакым «Щелкунчик и Мышиное королевство» ончер куандара. Шукерте огыл почылтшо ты экспозицийлан модыш-влакым 7-ше №-ан колоний поселенийысе судитлыме еҥ-влак ямдыленыт.
Выставкыш чумырымо персонаж-влак (а тыгайже – 200 наре!) ойыртемалтше улыт, кажне детальже юзо У ий шӱлышым пӧлекла. Изирак уна-влаклан келыштарыме фотозонышто Щелкунчик да Мышиный король дене войзалташ лиеш.
Экспонат-влакым 30 наре осуждённый ямдылен. Нунын кокла гыч икмынярже эрыкыш лектын шуктеныт, вет паша-влакым ятыр ий погымо. Но декоративно-прикладной усталык кружокыш коштшо икмыняр пашан авторжым администраций выставкым почмашке колтен.
Теат ты ончерыш миен толза, икшывыдамат пелен налза. Теле мучко пашам ыштыше ты усталык проект йоча-шамычым юзо тӱняш вӱден наҥгая, а кугыеҥым йомакын кӱлешлыкше нерген шонкалаш тарата.
УФСИН пресс-службын фотожо.