Марий Элым Вуйлатыше Юрий Зайцев эртыше совещанийыште корнысо аварийым шагалемдыме шотышто чолганрак пашам ышташ задачым шынден.
Корнышто лийше туткар-влак нерген МВД Госавтоинспекцийын Марий Элысе управлений начальникын пашажым жаплан шуктышо Андрей Шабалин, образований да науко министр Лариса Ревуцкая, транспорт да корно озанлык министр Александр Герасименко каласкаленыт.
– Пытартыш жапыште корно да транспорт туткарлаште колышо-влак 18,2 процентлан шагалемыныт, но тичмашнек ончалаш гын, корнысо аварийын чотшо лӱдыкшым шочыкта. Мемнан пашана – корным чыланыштлан, поснак йоча ден подростко-шамычлан, лӱдыкшыдымым ышташ, – палемден Юрий Зайцев.
Идалык мучаш марте индеш участкым (тиде 22 меҥге утла лиеш) тул дене волгалтарышаш улыт. Кок верыште, чылаже вич меҥге утла кужытышто, транспорт ваштарешла полосаш лектын ынже керт манын, делиниаторым йӧнештарыме.
Образований да науко министр йоча-влакын корно туткарыш логалмышт шотышто «Лаборатория безопасности» мобильный рӱдерым тӱрлӧ вере кондыштарыме нерген ойлен. Тыгак школ марте наҥгайыше кугорным «родительский контроль» эскераш полша. Кажне ийын изи инспектор-влаклан «Лӱдыкшыдымылык орава» республикысе конкурс эртаралтеш.
«Инфраструктура для жизни» нацпроектын «Безопасность дорожного движения» региональный проектше почеш вургемыш пижыкташ пычкемышыште волгалтарыше арверым пуэдат. Тений тудым налаш 100 процентлан шукырак оксам ойырымо. Тыге кум пачаш шукырак икшывылан – 25 тӱжем утла еҥлан – маркерым кучыктымо.
Регионысо транспорт да корно озанлык министрын палемдымыж почеш, тений «Безопасность дорожного движения» региональный проект почеш тротуарым волгалтараш корно фонд гыч 200 млн теҥгем колтымо.
Совещанийым иктешлыме годым Юрий Зайцев палемден: «Корнысо аварийлам чактарыме паша – тӱшка задаче, кудыжо кучем, Госавтоинспекций, тунемме тӧнеж, мер организаций да кажне гражданин деч тыршымашым йодеш».