Йошкар-Оласе туризм да информаций рӱдер «Российысе эн чапле туристский информационный рӱдер – 2023» конкурсышто ойыртемалтын.
Тидын нерген Новосибирск олаште эртаралтше «Дикоросы» форумышто увертареныт. Марий Элысе Спорт да туризм министерствын палемдымыж почеш, рӱдер туристический рынкыште Йошкар-Олам эреак сайын ончыкта. Тудлан кӧра турист-шамыч кундемысе оҥай да ӧрыктарыше верла дене палыме лийыт да толаш кумылаҥыт. Ты рӱдерын пашаеҥже-шамыч тӱрлӧ проектым темлат да илышыш шыҥдарат. Мутлан, Российысе «Туристический код» конкурсышто Марий Элысе участник-шамыч чылан гаяк призёр радамыште лийыныт.